കാത്തിരിപ്പ് അവസാനിച്ചു! കുറഞ്ഞ വിലയിൽ മികച്ച അനുഭവം നൽകാൻ അവൻ വരുന്നു; പോക്കോ പോഡ്‌സ് വയർലെസ് ഇന്ത്യയിലെത്തി; വിൽപന നാളെ മുതൽ

ആദ്യത്തെ ട്രൂ വയർലെസ് ഇയർബഡ്‌സ് വിപണിയിൽ അവതരിപ്പിച്ച് ജനപ്രിയ സ്മാർട്ട് ഫോൺ ബ്രാൻഡായ പോക്കോ. ‘പോക്കോ പോഡ്‌സ്’ എന്ന പേരിലാണ് ഉപകരണം ഇന്ത്യൻ വിപണിയിലെത്തിയത്. ഏറെ സവിശേഷതകളുമായാണ് പോക്കോ പോഡ്‌സ് എത്തുന്നത്. 30 മണിക്കൂർ മ്യൂസിക്ക് പ്ലേ ബാക്ക് ടൈം നൽകുന്ന ബാറ്ററിയാണ് പ്രധാന സവിശേഷത. ഫ്‌ളിപ്പ്കാർട്ടിലൂടെയാണ് പോക്കോ പോഡ്‌സ് വിൽപനയ്‌ക്കെത്തുന്നത്.

ഈ ട്രൂ വയർലെസ് ഇയർബഡ്‌സിൽ എൻവയോൺമെന്റൽ നോയിസ് ക്യാൻസലേഷൻ സംവിധാനമൊരുക്കിയിട്ടുണ്ട്. ഇതുവഴി ചുറ്റുപാടിലെ ശബ്ദങ്ങളെ കുറച്ച് മികച്ച ഓഡിയോ ക്വാളിറ്റി നൽകാൻ കഴിയുന്നു. നീളമുള്ള സ്‌റ്റെലും സിലിക്കൺ ഇയർബഡ്‌സുമാണ് പോക്കോ അവതരിപ്പിച്ചിരിക്കുന്നത്. ചാർജിംഗ് കേയിസിന് മുട്ടയുടെ ആകൃതിയാണുള്ളത്. മുൻ വശത്ത് മഞ്ഞ നിറത്തിൽ പോക്കോ ബ്രാൻഡിംഗും നൽകിയിട്ടുണ്ട്. വിയർപ്പിൽ നിന്ന് സംരക്ഷണമേർപ്പെടുത്താനായി സ്വെറ്റ് പ്രൂഫ് സംവിധാനവും ഇതിലുണ്ട്.

ആൻഡ്രോയിഡ് ഉപയോക്താക്കൾക്കായി ഡിസൈൻ ചെയ്തതാണെങ്കിലും ആപ്പിൾ ഐഫോൺ ഉപയോക്താക്കൾക്ക് ബ്ലൂടൂത്ത് വഴി ഇയർബഡുകൾ ബന്ധിപ്പിക്കാൻ കഴിയും. 12 എംഎം എക്‌സ്ട്രാ ബാസ് ഡ്രൈവറുകളുമായാണ് ഇത് വരുന്നത്. ബ്ലൂടൂത്ത് 5.3 കണക്ടിവിറ്റിയുള്ള ഇതിൽ ഗൂഗിളിന്റെ ഫാസ്റ്റ് പെയർ സംവിധാനവുമുണ്ട്. ടച്ച് കൺട്രോൾസും പോഡ്‌സിൽ നൽകിയിരിക്കുന്നു. 10 മീറ്റർ വയർലെസ് റേഞ്ച് ഉണ്ടെന്ന് പറയപ്പെടുന്നു. ഇയർബഡുകൾ പൂർണ്ണമായി ചാർജ് ചെയ്യാൻ 1.5 മണിക്കൂർ വരെ എടുക്കുമെന്ന് കമ്പനി പറയുന്നു. കേസിൽ യുഎസ്ബി പോർട്ട് ആണോ മൈക്രോ യുഎസ്ബി പോർട്ട് ആണോ ഘടിപ്പിച്ചിരിക്കുന്നത് വ്യക്തമായിട്ടില്ല. 2,999 രൂപയാണ് ഇതിന്റെ യഥാർത്ഥ വില. എന്നാൽ ലോഞ്ച് ഓഫറിന്റെ ഭാഗമായി ഇയർബഡ്‌സ് 1,199 രൂപയ്‌ക്ക് സ്വന്തമാക്കാവുന്നതാണ്. നാളെ മുതലാണ് ഫ്‌ളിപ്പ്കാർട്ടിൽ വിൽപന ആരംഭിക്കുക.