അമേരിക്കൻ ക്ലബ്ബായ ഇന്റർ മിയാമിയിലേക്കുളള മെസ്സിയുടെ വരവ് ഡേവിഡ് ബെക്കാം എന്ന ഇതിഹാസതാരം വർഷങ്ങൾക്ക് മുമ്പേ കണ്ട സ്വപ്നമായിരുന്നു.
നിറഞ്ഞു കവിഞ്ഞ സ്റ്റേഡിയത്തിലെ ആരാധകർക്ക് മുന്നിൽ മഴവിൽ ഫ്രീകിക്കിലൂടെ അത്ഭുതഗോളുമായി ഇതിഹാസ താരം ലയണൽ മെസി ഇന്റർ മിയാമിയിൽ അരങ്ങേറ്റം അവിസ്മരണീയമാക്കിയത് ദിവസങ്ങൾക്ക് മുമ്പാണ്. ഗ്യാലറിയിലെ ആരവങ്ങൾക്കിടയിൽ ആ നിമിഷം ടി വി സ്‌ക്രീനുകളിൽ ഒരാളെ ക്യാമറ സൂം ചെയ്ത് കാണിച്ചിരുന്നു. അത് മറ്റാരുമായിരുന്നില്ല ഇന്റർ മിയാമി ഉടമ ഡേവിഡ് ബെക്കാം എന്ന ഇതിഹാസ താരമായിരുന്നു. പിഎസ്ജിയിുമായുണ്ടായിരുന്ന രണ്ടുവർഷ കരാർ പൂർത്തിയാക്കിയതിന് ശേഷമാണ് മെസി പുതിയ തട്ടകമായി ഇന്റർ മയാമി തെരഞ്ഞെടുത്തത്. എന്നാൽ മെസി ഇന്റർ മിയാമിക്കായി പന്തുതട്ടുന്നത് വർഷങ്ങൾക്ക് മുമ്പേ സ്വപ്നം കണ്ടയാളുണ്ടായിരുന്നു.
ഇന്റർ മിയാമിക്കായുളള മെസിയുടെ അരങ്ങേറ്റത്തിന് ശേഷം ബെക്കാം പ്രതികരിച്ചത് ഇങ്ങനെയായിരുന്നു ‘എന്റെ സ്വപ്നം ഒടുവിൽ യാഥാർത്ഥ്യമായി’. ആ പ്രതികരണത്തിൽ എല്ലാം ഒളിച്ചിരിപ്പുണ്ടായിരുന്നു. കേവലം നിമിഷങ്ങൾ കൊണ്ട് ഉണ്ടായ ഒരു പ്രതികരണമായിരുന്നില്ല അതെന്ന് മെസിയുടെ വിജയ ഗോളിന് ദിവസങ്ങൾക്കു ശേഷം ബെക്കാം തുറന്നു പറഞ്ഞു.
David Beckham in tears after Lionel Messi’s goal.pic.twitter.com/HQKHv3kaxr
— Roy Nemer (@RoyNemer) July 22, 2023
“>
David Beckham in tears after Lionel Messi’s goal.pic.twitter.com/HQKHv3kaxr
— Roy Nemer (@RoyNemer) July 22, 2023
പത്ത് വർഷത്തെ പ്രയത്‌നത്തിന്റെ ഫലമായാണ് മെസി മിയാമിയിലെത്തിയതെന്ന വെളിപ്പെടുത്തലുമായാണ് ബെക്കാം രംഗത്തെത്തിയത്. പത്തുവർഷം മുമ്പ് മെസി എന്നെഴുതിയ ഇന്റർ മിയാമിയുടെ പത്താം നമ്പർ പിങ്ക് ജഴ്‌സി സ്വപ്നം കണ്ടാണ് ഡേവിഡ് ബെക്കാം ക്ലബിന്റെ സഹ ഉടമയായത്. 2013ൽ ഒരു അത്താഴ വിരുന്നിനിടെയാണ് ബെക്കാം ഇക്കാര്യം ആദ്യമായി മെസിയുമായി പങ്കുവയ്‌ക്കുന്നത്. ഒരു ദിവസം ഞങ്ങളുടെ ക്ലബ്ബിലേക്ക് വരണം, ഞങ്ങളുടെ ആരാധകർക്ക് മുന്നിൽ പന്തു തട്ടണം. അന്ന് മെസിയോട് പറഞ്ഞത് പൂർത്തിക്കരിക്കാനാണ് പിന്നീടുളള ശ്രമങ്ങളെന്നായിരുന്നു ബെക്കാം പറഞ്ഞത്. മെസിയുമായി ഇക്കാര്യം വെളിപ്പെടുത്തിയ ഉടൻ തന്നെ മെസിയുടെ പ്രതിനിധികളുമായി രഹസ്യ ചർച്ച നടത്താൻ ബാഴ്‌സലോണയിലേക്ക് പോയതായും ബെക്കാം വെളിപ്പെടുത്തുന്നു. ആദ്യം മെസിയുടെ പിതാവുമായി സംസാരിച്ചു. നിങ്ങളുടെ മകൻ ഞങ്ങളുടെ ക്ലബ്ബിൽ പന്തു തട്ടണമെന്നത് വലിയ സ്വപ്നമാണെന്ന് ബെക്കാം, ജോർജ്ജ് മെസിയോട് പറഞ്ഞുവെച്ചു. പിന്നെ ഓരോ തവണയും അതിനായുള്ള ശ്രമത്തിലായിരുന്നു.
ജൂണിലാണ് ഇന്റർ മിയാമിയുമായി രണ്ട് വർഷത്തെ കരാർ മെസി ഒപ്പുവച്ചത്. അന്ന് ബെക്കാം പറഞ്ഞത് ഇങ്ങനെയാണ് ‘ഒരു താരമായിരിക്കുമ്പോൾ എനിക്കുണ്ടായ അതേ വികാരം തന്നെ ഉടമ എന്ന നിലയിൽ ഉണ്ടാകുമെന്ന് ഞാൻ പ്രതീക്ഷിച്ചിരുന്നില്ല’. യൂറോപ്യൻ ലീഗുകളുടേയോ ക്ലബുകളുടെയോ തലപ്പൊക്കവും ആരാധകപിന്തുണയും മേജർ ലീഗ് സോക്കറിനില്ലാത്തതിനാൽ മെസിയുടെ വരവിൽ ആരാധകർക്ക് ആശങ്കകളേറെയായിരുന്നു. പക്ഷേ തന്റെ സ്വപ്നം യാഥാർത്ഥ്യമായതിന്റെ നിർവൃതിയിലായിരുന്നു ഫുട്‌ബോൾ ഇതിഹാസം ബെക്കാം……………
