ന്യൂ ഡൽഹി : പണപ്പെരുപ്പ സമ്മർദം ശക്തമാകുന്നതിനിടെ റിപ്പോ നിരക്ക് 25 ബേസിസ് പോയിന്റ് ഉയർത്തി 5.50 ശതമാനമാക്കി റിസർവ് ബാങ്ക് ഓഫ് ഇന്ത്യ (ആർബിഐ) 2023 ഫെബ്രുവരിക്ക് ശേഷം ആദ്യമായാണ് ആർബിഐ റിപ്പോ നിരക്ക് ഉയർത്തുന്നത്. ഉയർന്ന ക്രൂഡ് ഓയിൽ വില, പശ്ചിമേഷ്യയിലെ സംഘർഷം, ദുർബലമായ മൺസൂൺ തുടങ്ങിയ ഘടകങ്ങൾ പണപ്പെരുപ്പത്തിന് മേൽ സമ്മർദം വർധിപ്പിക്കുന്ന സാഹചര്യത്തിലാണ് ആർബിഐയുടെ നടപടി.
ആർബിഐയുടെ ആറ് അംഗങ്ങളുള്ള മോണിറ്ററി പോളിസി കമ്മിറ്റി ഏകകണ്ഠമായാണ് നിരക്ക് വർധിപ്പിക്കാൻ തീരുമാനിച്ചത്. ഇതോടെ റിപ്പോ നിരക്ക് 5.25 ശതമാനത്തിൽ നിന്ന് 5.50 ശതമാനമായി. നയനിലപാട് ‘ന്യൂട്രൽ’ എന്നതിൽ നിന്ന് ‘കാലിബ്രേറ്റഡ് ടൈറ്റനിംഗ്’ എന്ന നിലയിലേക്കും മാറ്റി. പണപ്പെരുപ്പ നിയന്ത്രണത്തിന് കൂടുതൽ പ്രാധാന്യം നൽകുന്ന സമീപനമാണ് ഇതിലൂടെ ആർബിഐ വ്യക്തമാക്കിയത്.
2023 ഫെബ്രുവരിയിലാണ് ഇതിന് മുമ്പ് റിപ്പോ നിരക്ക് ഉയർത്തിയത്. അന്ന് 25 ബേസിസ് പോയിന്റ് വർധിപ്പിച്ച് നിരക്ക് 6.50 ശതമാനമാക്കിയിരുന്നു. തുടർന്ന് 2025ൽ നിരക്ക് കുറയ്‌ക്കുന്നതിനുള്ള നടപടികളിലേക്ക് ആർബിഐ നീങ്ങിയിരുന്നു.
