കാർ വാങ്ങുമ്പോൾ ഇന്ത്യൻ ഉപഭോക്താക്കൾ ഏറ്റവുമധികം മുൻഗണന നൽകുന്നത് സുരക്ഷാ ക്രമീകരണങ്ങളായ ക്രാഷ്-ടെസ്റ്റ് റേറ്റിംഗിനും എയർബാഗുകളുടെ എണ്ണവുമാണെന്ന് സർവേ ഫലം. കാർ വാങ്ങുമ്പോൾ ഉപഭോക്താക്കളുടെ ഫീച്ചർ മുൻഗണകൾ അറിയാൻ സ്കോഡ ഓട്ടോ ഇന്ത്യയ്ക്ക് വേണ്ടി NIQ BASES നടത്തിയ സർവേയിലാണ് ഇക്കാര്യം വ്യക്തമായത്.
സർവേയിൽ പത്ത് ഉപഭോക്താക്കളിൽ ഒൻപത് പേരും എയർബാഗുകളും ക്രാഷ് ടെസ്റ്റ് റേറ്റിംഗുമുള്ള കാറുകൾ വാങ്ങുന്നതിനാണ് കൂടുതൽ താത്പര്യം കാണിക്കുന്നത്. അവ രണ്ടും പരിഗണിച്ചതിന് ശേഷമാണ് മൈലേജ് പരിഗണിക്കുന്നത്. 18-നും 54-നും ഇടയിൽ പ്രായമുള്ളവരിലാണ് സർവേ നടത്തിയത്. പ്രതികരിച്ചവരിൽ 80 ശതമാനം പേർ പുരുഷന്മാരും ബാക്കി സ്ത്രീകളുമായിരുന്നു. കാറിന്റെ ക്രാഷ് റേറ്റിംഗ് 22.3 ശതമാനം പേരും എയർബാഗുകളുടെ എണ്ണത്തിന് 21.6 ശതമാനം പേരും പ്രാധാന്യം നൽകി.
സർവേയിൽ പങ്കെടുത്ത 67 ശതമാനം പേരും അഞ്ച് ലക്ഷം രൂപയ്ക്ക് മുകളിൽ വില വരുന്ന കാർ ഉള്ളവരാണ്. സ്വന്തമായി കാറില്ലാത്തവർ ഒരു വർഷത്തിനുള്ളിൽ അഞ്ച് ലക്ഷം രൂപയ്ക്ക് മുകളിൽ വിലയുള്ള വാഹനം വാങ്ങുമെന്നാണ് പദ്ധതിയിടുന്നതെന്നും സർവേയിൽ പറയുന്നു.
