ചെന്നൈ: തമിഴ്‌നാട്ടില്‍ പത്തോളം കൊലപാതക കേസുകളില്‍ പ്രതിയായ രണ്ട് കൊടുംക്രിമിനലുകളെ വെടിവച്ച് കൊന്ന് പോലീസ്.ചെന്നെ താമ്പരത്തിന് സമീപം ഗുടുവഞ്ചേരില്‍ ഇന്ന് പുലര്‍ച്ചെ മൂന്നരയ്‌ക്കായിരുന്നു സംഭവം. രമേശ്(35), ചോട്ടാ വിനോദ്(32) എന്നിവരാണ് കൊല്ലപ്പെട്ടത്. ഇന്‍സ്‌പെക്ടര്‍ മുരുഗേശന്റെ നേതൃത്വത്തിലുള്ള സംഘമാണ് വെടിയുതിര്‍ത്തത്.
കൊല്ലപ്പെട്ട വിനോദ് പതിനാറും രമേശ് ആറും കൊലക്കേസുകളില്‍ പ്രതിയാണ്. വിനോദിനെതിരെ കൊലപാതക ശ്രമങ്ങളടക്കം 50ലേറെ കേസുകളുണ്ട്. രമേശിനെതിരെ 20ലേറെ കേസുകളുണ്ടെന്നുമാണ് വിവരം. വാഹനപരിശോധനക്കിടെ അതിവേഗതയിലെത്തിയ കാര്‍ ജീപ്പിലേക്ക് ഇടിച്ചുകയറ്റി തങ്ങളെ അക്രമിക്കുകയായിരുന്നെന്നും പ്രാണരക്ഷാര്‍ത്ഥം വെടിവെച്ചെന്നുമാണ് പോലീസ് വാദം. പോലീസുകാരനായ ശിവഗുരുനാഥന് ഇടതു കൈക്ക് പരിക്കേറ്റു.
ഇയാളെ തലയ്‌ക്ക് അക്രമിക്കാന്‍ ശ്രമിക്കുമ്പോഴാണ് വെടിവയ്പ്പുണ്ടായതെന്നാണ് പോലീസ് പറയുന്നത്. നാല് പേരാണ് വാഹനത്തിലുണ്ടായിരുന്നത്. ഇവരില്‍ രണ്ടുപേര്‍ ഓടിരക്ഷപ്പെട്ടു. എന്നാല്‍ പൊലീസ് ഏറ്റുമുട്ടല്‍ കൊല നടത്തിയെന്ന ആരോപണം ഇതിനകം ഉയര്‍ന്നിട്ടുണ്ട്.കാറിലുണ്ടായിരുന്നവര്‍ വെട്ടുകത്തിയുമായി പുറത്തേക്കിറങ്ങി ആക്രമിച്ചെന്നും നാടന്‍ ബോംബെറിഞ്ഞ് ഭീകരാന്തരീക്ഷം സൃഷ്ടിക്കുകയായിരുന്നു.
Comments