ബാങ്ക് ജീവനക്കാർക്ക് പ്രവൃത്തി ദിനം ആഴ്ചയിൽ അഞ്ച് ദിവസം; പ്രവൃത്തി സമയത്തിലും മാറ്റം; വിഷയം ധനകാര്യമന്ത്രാലയത്തിന്റെ പരിഗണനയിൽ

ന്യൂഡൽഹി: ബാങ്ക് ജീവനക്കാർക്ക് പ്രവൃത്തി ദിനം ആഴ്ചയിൽ അഞ്ച് ദിവസം ആക്കണമെന്ന ആവശ്യം അംഗീകരിച്ചതായി ഇന്ത്യൻ ബാങ്ക് അസോസിയേഷൻ (ഐ‌ബി‌എ). വിഷയം നിലവിൽ ധനകാര്യമന്ത്രാലയത്തിന്റെ പരിഗണനയിലാണ്.

കഴിഞ്ഞ മാസം 28-ന് ചേർന്ന ഇന്ത്യൻ ബാങ്കിങ് അസോസിയേഷന്‍റെ യോ​ഗത്തിൽ ശനിയാഴ്ചകൾ ബാങ്ക് അവധിയായി പ്രഖ്യാപിക്കണമെന്ന് ആവശ്യം ഉന്നയിച്ചിരുന്നു. തുടർന്ന് ഈ ആവശ്യത്തിന് ഐബിഎ അം​ഗീകാരം നൽകുകയും ധനകാര്യ മന്ത്രാലയത്തിന്‍റെ പരിഗണനയ്‌ക്ക് വിടുകയും ചെയ്തു. പ്രതിവാര അവധി രണ്ട് ദിവസമാക്കുന്നത് കൂടാതെ, ജീവനക്കാരുടെ ശമ്പള വർധനവും വിരമിച്ചവർക്കുള്ള ഗ്രൂപ്പ് മെഡിക്കൽ ഇൻഷുറൻസ് പോളിസിയും യോഗത്തിൽ ചർച്ചയായിരുന്നു. ദിവസേന 40 മിനിറ്റ് അധികം ജോലി ചെയ്യണമെന്നും കരട് നിർദ്ദേശത്തിൽ പരാമർശിക്കുന്നുണ്ട്. ഇതിന് പ്രകാരം രാവിലെ 9.45 മുതൽ വൈകിട്ട് 5.30 വരെയായിരിക്കും പുതിയ പ്രവൃത്തി സമയം.

2021ൽ ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ (എൽഐസി) ആയിരുന്നു ആഴ്ചയിൽ അഞ്ച് ദിവസം മാത്രം പ്രവൃത്തി ദിവസമാക്കി ചുരുക്കണമെന്ന നിർദേശം നടപ്പിലാക്കിയത്. ഇതിന് പിന്നാലെ സമാന ആവശ്യവുമായി ബാങ്ക് ജീവനക്കാരെത്തുകയായിരുന്നു. അതേസമയം ബാങ്ക് ജീവനക്കാരുടെ പ്രവൃത്തിദിനങ്ങൾ ആഴ്ചയിൽ അഞ്ച് ആക്കുന്നതിൽ എതിർപ്പില്ലെന്ന് കേന്ദ്രധനകാര്യ മന്ത്രാലയം നേരത്തെ തന്നെ വ്യക്തമാക്കിയിരുന്നു.

നിലവിൽ എല്ലാ ഞായറാഴ്ചകളിലും, മാസത്തിലെ രണ്ടാമത്തെയും നാലാമത്തെയും ശനിയാഴ്ചകളിലുമാണ് ബാങ്ക് ജീവനക്കാർക്ക് അവധിയുള്ളത്. ഇതിനോടൊപ്പം ആഘോഷദിവസങ്ങളിലും അവധിയാണ്. ആർബിഐ തയ്യാറാക്കുന്ന അവധി ദിനങ്ങളുടെ പട്ടിക എല്ലാ ബാങ്ക് ജീവനക്കാർക്കും ബാധകമാണ്.