ഏഷ്യൻ ഗെയിംസിനുളള ഇന്ത്യൻ ക്രിക്കറ്റ് ടീമുകളുടെ ജേഴ്സിയിൽ നിന്ന് ബിസിസിഐ ലോഗോയും ജേഴ്സി സ്പോൺസർമാരായ ഡ്രീം ഇലവനും പുറത്ത്. ബിസിസിഐ ലോഗോയ്ക്ക് പകരം ഇന്ത്യൻ ഒളിമ്പിക്സ് അസോസിയേഷന്റെ ലോഗോയാണ് ഉണ്ടാകുക. ഇന്ത്യൻ ടീം കഴിഞ്ഞ 5 പതിറ്റാണ്ടിലേറെയായി ബിസിസിഐ ലോഗോ ഇല്ലാതെ കളിക്കളത്തിൽ ഇറങ്ങിയിട്ടില്ല. ബിസിസിഐയുടെ കിറ്റ് സ്പോൺസർമാരായ ഡ്രീം ഇലവന് പകരം, ഏഷ്യൻ ഗെയിംസ് ടീമുകളുടെ സ്പോൺസർമാരായ ജെ.എസ്.ഡബ്ലൂവിന്റെ ലോഗോ ആയിരിക്കും ജേഴ്സിയിൽ.
ഏഷ്യൻ ഗെയിംസിൽ ടീമുകൾ പങ്കെടുക്കുന്നത് ഇന്ത്യൻ ഒളിമ്പിക്സ് അസോസിയേഷന് കീഴിലായതിനാലാണ് ബിസിസിഐ കളത്തിന് പുറത്ത് പോയത്. ഇന്ത്യൻ ഫുട്ബോൾ ടീമിന്റെ ജേഴ്സിയിലും ഇക്കാരണത്താൽ അഖിലേന്ത്യ ഫുട്ബോൾ അസോസിയേഷന്റെ ലോഗോ ഉണ്ടാകില്ല. കോമൺവെൽത്ത് ഗെയിംസിൽ വനിതാ ക്രിക്കറ്റ് ടീം ടീം ലോഗോയില്ലാത്ത ജേഴ്സി അണിഞ്ഞിരുന്നു. എന്നാൽ പുരുഷൻമാരുടെ ജേഴ്സിയിൽ നിന്ന് ബിസിസിഐ ലോഗോ ഇല്ലാതാകുന്നത് അപൂർവ്വ സംഭവമാണ്.
