ജെന്റിൽമാൻ-2വിന്റെ ടൈറ്റിൽ മോഷൻ പോസ്റ്റർ പുറത്തു വിട്ടു. ഓസ്കർ ജേതാവായ സംഗീത സംവിധായകൻ എം.എം.കീരവാണി തന്റെ സമൂഹമാദ്ധ്യമ അക്കൗണ്ടുകളിലൂടെയാണ് ടൈറ്റിൽ മോഷൻ പോസ്റ്റർ റിലീസ് ചെയ്തത്. കീരവാണി പശ്ചാത്തലമായി നൽകിയ തീം മ്യുസിക്കിന്റെ അകമ്പടിയോടെയാണ് ടൈറ്റിൽ മോഷൻ പോസ്റ്റർ എത്തിയിട്ടുള്ളത്. ഈ തീം മ്യുസിക്ക് തന്നെ ചിത്രത്തെ കുറിച്ച് വലിയ പ്രതീക്ഷയാണ് നൽകുന്നത്. കുറഞ്ഞ സമയത്തിനുള്ളിൽ തന്നെ വലിയ വരവേൽപ്പാണ് ആരാധകരിൽ നിന്നും മോഷൻ പോസ്റ്ററിന് ലഭിച്ചത്.
മലയാളിയായ കെ.ടി.കുഞ്ഞുമോനാണ് ഈ ബ്രഹ്മാണ്ഡ ചിത്രം നിർമ്മിക്കുന്നത്. നാനി നായകനായ ‘ ആഹാ കല്യാണം ‘എന്ന ജനപ്രിയ സിനിമയിലൂടെ ശ്രദ്ധേയനായ എ. ഗോകുൽ കൃഷ്ണയാണ് ജെന്റിൽമാൻ-2വിന്റെ സംവിധായകൻ. ഓസ്കാർ അവാർഡ് നേടിയ ശേഷം കീരവാണി സംഗീതം നൽകുന്ന ആദ്യ തമിഴ് ചിത്രമാണ് ജെന്റിൽമാൻ 2. തമിഴ് – തെലുങ്ക് സിനിമകളിൽ അഭിനയിച്ചു ശ്രദ്ധേയനായ യുവ താരം ചേതൻ ചീനുവാണ് സിനിമയിൽ കേന്ദ്രകഥാപാത്രമായിയെത്തുന്നത്. മലയാളികളായ നയൻതാരാ ചക്രവർത്തിയും പ്രിയാ ലാലുമാണ് ജെന്റിൽമാൻ 2വിലെ നായികമാർ. ആദ്യഭാഗത്തേക്കാൾ പലമടങ്ങ് ബ്രഹ്മാണ്ഡമായിരിക്കും രണ്ടാംഭാഗമെന്നും തമിഴ്, തെലുങ്ക്, ഹിന്ദി, മലയാളം ഭാഷകളിൽ റിലീസ് ചെയ്യുന്ന ബിഗ് ബജറ്റ് ചിത്രമായിരിക്കും ഇതെന്നും കുഞ്ഞുമോൻ നേരത്തെ അറിയിച്ചിരുന്നു.
തൊണ്ണൂറുകളിൽ പണം വാരി വിതറി ബ്രഹ്മാണ്ഡ മേക്കിങ്ങിലൂടെ ഇന്ത്യൻ സിനിമയുടെ തന്നെ മുഖച്ഛായ മാറ്റിയ ട്രെൻഡ് സെറ്റർ ചിത്രമായിരുന്നു കുഞ്ഞുമോൻ നിർമ്മിച്ച ജെന്റിൽമാൻ. ഇന്ത്യൻ സിനിമയിലെ മുൻനിര സംവിധായകരുടെ കൂട്ടത്തിലേക്ക് ശങ്കറിന് സ്ഥാനം നേടാൻ കാരണമായി ഭവിച്ച സിനിമയായിരുന്നു
1993-ൽ റിലീസ് ചെയ്ത ജെന്റിൽമാൻ.
മുപ്പതുവർഷങ്ങൾക്ക് ശേഷം അതേ പേരുമായി ഇന്ത്യൻ സിനിമയിലെ പ്രഗത്ഭരായ സാങ്കേതിക വിദഗ്ധരെ അണിയറയിൽ അണിനിരത്തിയാണ് മെഗാ പ്രൊഡ്യൂസർ എന്ന വിശേഷണമുള്ള കെ.ടി.കുഞ്ഞുമോൻ ബ്രഹ്മാണ്ഡമായി തന്നെ ‘ജെന്റിൽമാൻ-2’ നിർമ്മിക്കുന്നത്. സാധാരണയായി താരങ്ങളെ ആശ്രയിക്കാതെ, വളർന്നു വരുന്ന കഴിവുള്ള അഭിനേതാക്കളെ പ്രോത്സാഹിപ്പിച്ച്, ശക്തമായ കഥയിലും മേക്കിങ്ങിലും വിശ്വാസമർപ്പിച്ച് വെള്ളിത്തിരയിൽ വിസ്മയം തീർക്കുക എന്നതാണ് കുഞ്ഞുമോൻ സ്റ്റൈൽ. ഇക്കുറിയും അങ്ങനെ തന്നെയാണ്. കീരവാണി, കവി പേരാരശ് കലാ സംവിധായകൻ തോട്ടാധരണി, ക്യാമറാമൻ അജയൻ വിൻസെൻറ്, എഡിറ്റർ സതീഷ് സൂര്യ, സ്റ്റണ്ട് മാസ്റ്റർ ദിനേശ് കാശി തുടങ്ങിയവർ ഈ സിനിമയ്ക്കായി അണിനിരക്കുന്നുണ്ട്.
