മീററ്റ്: മർച്ചന്റ് നേവി ഉദ്യോഗസ്ഥനായ സൗരഭ് രജ്പുതിനെ കൊലപ്പെടുത്തി മൃതദേഹം കഷണങ്ങളാക്കി നീല പ്ലാസ്റ്റിക് ഡ്രമ്മിലൊളിപ്പിച്ച കേസിൽ ഭാര്യ മുസ്‌കാൻ രസ്തോഗിക്കും കാമുകൻ സാഹിൽ ശുക്ലയ്‌ക്കും വധശിക്ഷ വിധിച്ച കോടതി, വിധി പ്രഖ്യാപനത്തിനിടെ ഭഗവദ്ഗീതയെയും മഹാഭാരതത്തെയും പരാമർശിച്ചതായി ഇരകളുടെ അഭിഭാഷകർ. തെറ്റ് ചെയ്യുന്നവരെ ശിക്ഷിക്കുന്നതും ധർമത്തിന്റെ ഭാഗമാണെന്ന ആശയം ജഡ്ജി മുന്നോട്ടുവച്ചതായി അഭിഭാഷകർ മാധ്യമങ്ങളോട് പറഞ്ഞു. എന്നാൽ വിധിയുടെ പൂർണമായ രേഖാമൂലമുള്ള പകർപ്പ് ലഭ്യമായിട്ടില്ലാത്തതിനാൽ പരാമർശങ്ങളുടെ കൃത്യമായ വാക്കുകൾ ഔദ്യോഗികമായി സ്ഥിരീകരിച്ചിട്ടില്ല.
ബുധനാഴ്ചയാണ് മീററ്റ് ജില്ലാ സെഷൻസ് കോടതി സൗരഭ് രജ്പുത് കൊലക്കേസിൽ ശിക്ഷ പ്രഖ്യാപിച്ചത്. ജില്ലാ ജഡ്ജി അരവിന്ദ് കുമാർ മിശ്രയാണ് കേസ് പരിഗണിച്ചത്. വിധി പ്രഖ്യാപനത്തിനിടെ കടമ, ധർമം, കുറ്റം ചെയ്തവർക്കുള്ള ശിക്ഷ എന്നിവയെക്കുറിച്ച് ജഡ്ജി സംസാരിച്ചതായാണ് അഭിഭാഷകർ വ്യക്തമാക്കിയത്.
“കോടതി അതിന്റെ കടമ നിർവഹിക്കുമെന്ന് കാണിക്കാൻ ജഡ്ജി മഹാഭാരതത്തെക്കുറിച്ച് പരാമർശങ്ങൾ നടത്തി. തെറ്റ് ചെയ്തവരെ ശിക്ഷിക്കുക എന്നതും ധർമത്തിന്റെ അർത്ഥമാണെന്ന് അദ്ദേഹം പറഞ്ഞു. പ്രതിഭാഗം അഭിഭാഷകർ ശ്രമിച്ചിട്ടും കോടതി അതിന്റെ കടമ നിർവഹിച്ചു,” സൗരഭ് രജ്പുതിന്റെ അഭിഭാഷകൻ പറഞ്ഞു.
ഭഗവദ്ഗീതയിലെ കടമയുടെ സന്ദേശം
മഹാഭാരതത്തിന്റെ ഭാഗമായ ഭഗവദ്ഗീതയിൽ കുരുക്ഷേത്ര യുദ്ധഭൂമിയിൽ ഭഗവാൻ ശ്രീകൃഷ്ണൻ അർജുനന് കടമയെയും ധർമത്തെയും കുറിച്ച് ഉപദേശിക്കുന്നതാണ് പ്രധാന സന്ദർഭം. വ്യക്തിപരമായ ആശങ്കകൾക്കപ്പുറം തന്റെ കടമ നിർവഹിക്കേണ്ടതിന്റെ പ്രാധാന്യമാണ് ഗീതയിൽ കൃഷ്ണൻ അർജുനനെ ഓർമിപ്പിക്കുന്നത്.
ഈ പശ്ചാത്തലത്തിലാണ് മീററ്റ് കൊലക്കേസിൽ ശിക്ഷ പ്രഖ്യാപിക്കുമ്പോൾ ജഡ്ജി ധർമത്തെയും കടമയെയും പരാമർശിച്ചതായി അഭിഭാഷകർ വിശദീകരിച്ചത്. കുറ്റകൃത്യങ്ങൾക്ക് ശിക്ഷ നൽകുന്നതും നീതിന്യായ വ്യവസ്ഥയുടെ കടമയാണെന്ന ആശയമാണ് കോടതി മുന്നോട്ടുവച്ചതെന്നാണ് അവരുടെ പ്രതികരണം. വിധിയുടെ പൂർണരേഖ പുറത്തുവരുന്നതോടെ പരാമർശങ്ങളുടെ കൃത്യമായ ഉള്ളടക്കം വ്യക്തമാകും.
126 വാദങ്ങൾ; 22 സാക്ഷികളുടെ മൊഴി
സൗരഭ് രജ്പുത് കൊലക്കേസിൽ ദീർഘമായ വിചാരണയ്‌ക്കുശേഷമാണ് കോടതി ശിക്ഷ പ്രഖ്യാപിച്ചത്. ആകെ 126 വാദംകേൾക്കലുകൾ നടന്നതായും 22 സാക്ഷികളുടെ മൊഴികൾ രേഖപ്പെടുത്തിയതായും റിപ്പോർട്ടുകളുണ്ട്. ശിക്ഷ പ്രഖ്യാപിക്കുന്നതിന് രണ്ടാഴ്ച മുമ്പ് മുസ്‌കാനെയും സാഹിലിനെയും കോടതി കുറ്റക്കാരായി കണ്ടെത്തിയിരുന്നു.
ഇരുവരും ചേർന്ന് സൗരഭിനെ കൊലപ്പെടുത്താൻ ഗൂഢാലോചന നടത്തിയെന്നും മൃതദേഹം കഷണങ്ങളാക്കി നീല ഡ്രമ്മിൽ ഒളിപ്പിച്ചെന്നുമാണ് പ്രോസിക്യൂഷൻ വാദിച്ചത്. ഇത്തരം കുറ്റകൃത്യങ്ങൾ സമൂഹത്തിൽ ഭീതിയുടെ അന്തരീക്ഷം സൃഷ്ടിക്കുന്നുവെന്നും കോടതി നിരീക്ഷിച്ചതായി റിപ്പോർട്ടുകളുണ്ട്.
‘സൗരഭ് നല്ല മനുഷ്യനായിരുന്നു’; മുസ്‌കാന്റെ മാതാപിതാക്കൾ
ശിക്ഷ പ്രഖ്യാപിക്കുന്നതിന് മുമ്പ് മുസ്‌കാന്റെ മാതാപിതാക്കളും കോടതിയിൽ നിലപാട് അറിയിച്ചതായി റിപ്പോർട്ടുണ്ട്. സൗരഭ് നല്ല വ്യക്തിയായിരുന്നുവെന്നും കുറ്റവാളികൾക്ക് വധശിക്ഷ നൽകുന്നതിനെ എതിർക്കില്ലെന്നും അവർ പറഞ്ഞതായാണ് വിവരം. മുസ്‌കാന്റെ കുടുംബം ജയിലിൽവച്ച് അവരെ സന്ദർശിച്ചിട്ടില്ലെന്നും റിപ്പോർട്ടുകൾ സൂചിപ്പിക്കുന്നു.
ഭക്ഷണത്തിൽ ഉറക്കഗുളിക കലർത്തി; പിന്നാലെ കൊലപാതകം
2025 മാർച്ച് മൂന്നിന് മീററ്റിലെ ഇന്ദ്രനഗറിലുള്ള വീട്ടിൽവച്ചാണ് സൗരഭ് രജ്പുത് കൊല്ലപ്പെട്ടത്. ഭക്ഷണത്തിൽ ഉറക്കഗുളികകൾ കലർത്തി നൽകിയശേഷം മുസ്‌കാനും വീട്ടിലെത്തിയ സാഹിൽ ശുക്ലയും ചേർന്ന് സൗരഭിനെ കുത്തിക്കൊലപ്പെടുത്തിയെന്നാണ് പ്രോസിക്യൂഷൻ കേസ്.
തുടർന്ന് മൃതദേഹം കുളിമുറിയിൽവച്ച് കഷണങ്ങളാക്കി മുറിച്ച് നീല പ്ലാസ്റ്റിക് ഡ്രമ്മിൽ നിറച്ചു. അഴുകുന്നതിന്റെ ദുർഗന്ധം പുറത്തുവരാതിരിക്കാനായി മണൽ, വെള്ളം, സിമന്റ് എന്നിവയുടെ മിശ്രിതം ഉപയോഗിച്ച് ഡ്രം അടച്ചതായും അന്വേഷണത്തിൽ കണ്ടെത്തി. കൊലപാതകത്തിന് പിന്നാലെ ഇരുവരും ഹിമാചൽ പ്രദേശിലേക്ക് കടന്നതായും പോലീസ് പറഞ്ഞു. സൗരഭിന്റെ മൊബൈൽ ഫോൺ ഉപയോഗിച്ച് കുടുംബാംഗങ്ങൾക്ക് സന്ദേശങ്ങൾ അയച്ച് അദ്ദേഹം ജീവിച്ചിരിപ്പുണ്ടെന്ന പ്രതീതി സൃഷ്ടിക്കാനും ശ്രമിച്ചെന്നാണ് അന്വേഷണത്തിലെ കണ്ടെത്തൽ.
ആറുവയസ്സുകാരിയുടെ വാക്കുകൾ അന്വേഷണത്തിൽ നിർണായകമായി
2025 മാർച്ച് 17ന് സൗരഭിന്റെ ബന്ധുക്കൾ സംശയത്തെത്തുടർന്ന് വീട്ടിലെത്തി. ദമ്പതികളുടെ ആറുവയസ്സുകാരിയായ മകൾ അയൽക്കാരോട് “പപ്പ ഡ്രമ്മിലാണ്” എന്ന് പറഞ്ഞതായി റിപ്പോർട്ടുകളുണ്ട്. തുടർന്ന് പോലീസ് ഡ്രം തുറന്ന് പരിശോധിച്ചപ്പോഴാണ് സൗരഭിന്റെ മൃതദേഹാവശിഷ്ടങ്ങൾ കണ്ടെത്തിയത്. സംഭവവുമായി ബന്ധപ്പെട്ട് രണ്ടുദിവസത്തിനുശേഷം മുസ്‌കാനെയും സാഹിലിനെയും അറസ്റ്റ് ചെയ്തു.
കടയിലെ ബില്ലുകളും മൊബൈൽ രേഖകളും തെളിവായി
വിചാരണയ്‌ക്കിടെ സാഹചര്യത്തെളിവുകൾ, സാങ്കേതിക രേഖകൾ, ഭൗതിക തെളിവുകൾ എന്നിവയാണ് പ്രോസിക്യൂഷൻ ഹാജരാക്കിയത്. കൊലപാതകത്തിന് മുമ്പ് പ്രതികൾക്ക് നീല ഡ്രം, സിമന്റ് ബാഗുകൾ, മണൽ, മാംസം മുറിക്കുന്ന കത്തികൾ, റേസറുകൾ എന്നിവ വിറ്റതായി കടയുടമകൾ മൊഴി നൽകിയിരുന്നു.
കൊലപാതകം നടന്ന സമയത്ത് സാഹിൽ വീട്ടിലുണ്ടായിരുന്നുവെന്ന് സൂചിപ്പിക്കുന്ന കോൾ ഡീറ്റെയിൽ രേഖകളും മൊബൈൽ ടവർ വിവരങ്ങളും പ്രോസിക്യൂഷൻ അവതരിപ്പിച്ചു. ഷിംലയിലെയും മണാലിയിലെയും ഹോട്ടലുകളിൽ ഇരുവരും താമസിച്ചതുമായി ബന്ധപ്പെട്ട വിവരങ്ങളും അന്വേഷണത്തിൽ പുറത്തുവന്നു. സൗരഭ് കുത്തേറ്റാണ് മരിച്ചതെന്ന് പോസ്റ്റ്‌മോർട്ടം റിപ്പോർട്ടും സ്ഥിരീകരിച്ചു.
കൊലപാതകവും മൃതദേഹം ഒളിപ്പിക്കലും ഉൾപ്പെടെയുള്ള കുറ്റങ്ങൾ തെളിഞ്ഞതായി കണ്ടെത്തിയതിനെത്തുടർന്നാണ് കോടതി ഇരുവർക്കും വധശിക്ഷ വിധിച്ചത്.
