ദുബായ്: അണ്ടർ 19 പുരുഷ ക്രിക്കറ്റ് ലോകകപ്പിന് യോഗ്യത നേടിയ അമേരിക്കൻ ടീമിനായി കളിക്കളത്തിലിറങ്ങുക ഇന്ത്യൻ വംശജർ. കൗമാര ലോകകപ്പ് പോരാട്ടത്തിലേയ്ക്ക് അമേരിക്കൻ യോഗ്യത നേടിയത് ക്വാളിഫൈർ ടൂർണമെന്റിൽ ഗ്രൂപ്പ് ചാമ്പ്യൻമാരായതോടെയാണ്. ഇന്ത്യ, അഫ്ഗാനിസ്ഥാൻ, ഓസ്ട്രേലിയ, ഇംഗ്ലണ്ട്, അയർലൻഡ്, പാക്കിസ്ഥാൻ, ദക്ഷിണാഫ്രിക്ക, ശ്രീലങ്ക, വെസ്റ്റിൻഡീസ് ടീമുകൾ നേരത്തെ തന്നെ ലോകകപ്പ് യോഗ്യത നേടിയിരുന്നു.ക്വാളിഫയർ റൗണ്ട് വഴി ന്യൂസീലൻഡ്, നേപ്പാൾ, നമീബിയ, സ്കോട്ലൻഡ് എന്നീ ടീമുകളാണ് അമേരിക്കക്കൊപ്പം കൗമാരപ്പോരാട്ടത്തിനെത്തുന്നത്. ശ്രീലങ്കയിൽ അടുത്ത വർഷമാണ് അണ്ടർ 19 ക്രിക്കറ്റ് ലോകകപ്പ് അരങ്ങേറുക.
ലോകകപ്പ് ടീമംഗങ്ങളെ കണ്ടാൽ തെല്ലും തോന്നില്ല ഇവർ അമേരിക്കകാരാണെന്ന്. പക്ഷേ ഇവരെ കാണുന്നവർക്ക് ഇന്ത്യക്കാരാണെന്ന് തോന്നും. കാരണം ടീമിലെ മുഴുവൻ അംഗങ്ങളും ഇന്ത്യൻ വംശജരാണ്. 15 അംഗ യുഎസ് ടീമിനെ നയിക്കുക ഋഷി രമേഷാണ്. വൈസ് ക്യാപ്റ്റൻ ഉത്കർഷ് ശ്രീവാസ്തവ, ടീമിന്റെ പ്രധാന താരങ്ങളായ അർജുൻ മഹേഷ്, ആര്യൻ സതീഷ്, പാർഥ് പട്ടേൽ തുടങ്ങിയവരുമായാണ് അമേരിക്ക കിരീടപ്പോരാട്ടത്തിനിറങ്ങുന്നത്. കഴിഞ്ഞവർഷം അണ്ടർ 19 വനിതാ ക്രിക്കറ്റ് ലോകകപ്പിലും യുഎസ് ടീമിൽ ഒട്ടേറെ ഇന്ത്യൻ വംശജർ ഇടംപിടിച്ചിരുന്നു.
Comments