തിരുവനന്തപുരം: സൗര ദൗത്യവുമായി ആദിത്യ-എൽ1 ശനിയാഴ്ച വിക്ഷേപണത്തിനൊരുങ്ങുകയാണ് ഐഎസ്ആർഒ. സൂര്യനെ പഠിക്കുന്നതിനായി ഏഴ് ഉപകരണങ്ങളാണ് പേടകത്തിൽ ഐഎസ്ആർഒ സജ്ജമാക്കിയിട്ടുള്ളത്. വിസിബിൾ ലൈൻ എമിഷൻ കൊറോണഗ്രാഫ് (വിഇഎൽസി), സോളാർ അൾട്രാവയലറ്റ് ഇമേജിംഗ് ടെലിസ്കോപ്പ് (എസ് യു ഐ ടി), സോളാർ ലോ എനർജി എക്സ് റേ സ്പെക്ട്രോമീറ്റർ, ഹൈ എനർജി എൽ-1 ഓർബിറ്റിംഗ് എക്സ്റേ സ്പെക്ട്രോമീറ്റർ, ആദിത്യ സോളാർ വിൻഡ് പാർട്ടിക്കിൾ എക്സ്പിരിമെന്റ്, പ്ലാസ്മ അനലൈസർ പാക്കേജ് ഫോർ ആദിത്യ, മാഗ്നെറ്റോമീറ്റർ എന്നിവയാണ് പേടകത്തിൽ സജ്ജമാക്കിയിരിക്കുന്ന ഏഴ് ഉപകരണങ്ങൾ. ഇവയിൽ നാലെണ്ണം പേടകത്തിലെ എൽ-1 എന്ന പ്രത്യേക സ്ഥാനത്ത് നിന്നും സൂര്യനെ നേരിട്ടാകും നിരീക്ഷിക്കുക. ബാക്കിയുള്ള മൂന്ന് ഉപകരണങ്ങൾ പ്രധാനമായും കണങ്ങളെയും ഫീൽഡുകളെയും കുറിച്ച് പഠിക്കും.
സൂര്യന്റെ പ്രവർത്തനം ഗ്രഹങ്ങൾക്കിടയിലുള്ള സ്ഥലത്തെ ഏത് തരത്തിലാണ് ബാധിക്കുന്നത് എന്നതിനെക്കുറിച്ച് പഠിക്കാൻ ഇത് സഹായിക്കും. കൊറോണൽഹീറ്റിംഗ്, കൊറോണൽമാസ് എജക്ഷനുകൾ, പ്രീഫ്ളെയർ ആൻഡ് ഫ്ളെയർ പ്രവർത്തനങ്ങൾ, ബഹിരാകാശ കാലാവസ്ഥയുടെ ചലനാത്മകത, കണങ്ങളുടെയും ഫീൽഡുകളുടെയും ചലനം ഏത് വിധത്തിൽ, സൂര്യന്റെ വിവിധ വശങ്ങളെക്കുറിച്ചുള്ള നിർണായക വിവരങ്ങൾ എന്നിവ ആദിത്യ എൽ-1 പേലോഡുകൾ നൽകും. അഹമ്മദാബാദിലെ ഫിസിക്കൽ റിസർച്ച് ലബോറട്ടറി, ബെംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് അസ്ട്രോ ഫിസിക്സ്, പൂനെയിലെ ഇന്റർ യൂണിവേഴ്സിറ്റി സെന്റർ ഫോർ അസ്ട്രോണമി ആൻഡ് അസ്ട്രോഫിസിക്സ്, കൊൽക്കത്തയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് റിസർച്ച് എന്നിവയുടെ സഹകരണത്തോടെയാണ് പേടകം സജ്ജമാക്കിയിരിക്കുന്നത്.
ബെംഗളൂരുവിലെ അസ്ട്രോഫിസിക്കൽ ഇൻസ്റ്റിറ്റ്യൂട്ടാണ് സുപ്രധാന ഉപകരണമായ വിസിബിൾ ലൈൻ എമിഷൻ കൊറോണഗ്രാഫിന്റെ നിർമ്മാണം നിർവഹിച്ചത്. പൂനെ ഇന്റർയൂണിവേഴ്സിറ്റി സെന്റർ ഫോർ അസ്ട്രോണമിയാണ് സൂര്യനെ കവർ ചെയ്യാൻ സാധിക്കുന്ന സോളാർ അൾട്രാവയലറ്റ് ഇമേജിംഗ് ടെലിസ്കോപ്പ് സജ്ജമാക്കിയത്.
