റിസര്‍വ് ദിനത്തിലും മഴ! ഇന്ത്യ-പാക് പോരാട്ടം വീണ്ടും അനിശ്ചിതത്ത്വത്തില്‍; ഓവറുകള്‍ ചുരുക്കിയേക്കും

കൊളംബോ: ഏഷ്യാകപ്പ് ക്രിക്കറ്റിലെ ഇന്ത്യ-പാകിസ്താന്‍ സൂപ്പര്‍ ഫോര്‍ പോരാട്ടം ഇന്നും നടക്കാനിടയില്ല. രസംകൊല്ലിയായി റിസര്‍വ് ദിനത്തിലും മഴയെത്തിയതാണ് വിനയായത്. മൂന്ന് മണിക്ക് ആരംഭിക്കേണ്ട പോരാട്ടം ഇതുവരെ തുടങ്ങാനായിട്ടില്ല. കഴിഞ്ഞ ദിവസം ഇന്ത്യയുടെ നല്ലതുടക്കത്തിന് ശേഷമാണ് മത്സരച്ചൂട് തണുപ്പിച്ച് മഴയെത്തിയത്. കൊളംബോയിലാണ് മത്സരം. ഇന്ന് മഴമാറിയാല്‍ ഓവറുകള്‍ വെട്ടിച്ചുരുക്കാന്‍ ഇടയുണ്ട്. ഒടുവില്‍ ലഭിക്കുന്ന വിവരം അനുസരിച്ച് മഴയ്‌ക്ക് കുറച്ച് ശമനമുണ്ടെന്നാണ് സൂചന.

ഓപ്പണര്‍മാരായ രോഹിത് ശര്‍മയും ശുഭ്മാന്‍ ഗില്ലും ചേര്‍ന്ന് തകര്‍പ്പന്‍ തുടക്കമാണ് ഇന്ത്യയ്‌ക്ക് നല്‍കിയത്. ഇരുവരും ആദ്യ വിക്കറ്റില്‍ 121 റണ്‍സ് കൂട്ടിച്ചേര്‍ത്ത ശേഷം പുറത്താക്കി. വിരാട് കോഹ്ലിയും കെ.എല്‍.രാഹുലുമാണ് ക്രീസിലുള്ളത്. അര്‍ദ്ധ സെഞ്ച്വറി പൂര്‍ത്തിയാക്കിയ ശേഷമാണ് ഗില്ലും രോഹിത്തും കൂടാരം കയറിയത്.

പേരുകേട്ട പാക് പേസ് നിരയെ തച്ചുതകര്‍ത്താണ് ഗില്ലാണ് അക്രമത്തിന് തുടക്കമിട്ടത് പിന്നാലെ രോഹിതും അക്രമണത്തിന്റെ കടിഞ്ഞാണ്‍ ഏറ്റെടുത്തു. ഇതോടെ വമ്പന്‍ പേസ് നിര ചൂളിപ്പോയി. ഗില്‍ 13-ാം ഓവറില്‍ അര്‍ദ്ധസെഞ്ച്വറി നേടി. 37 പന്തില്‍ നിന്നാണ് താരം അര്‍ദ്ധസെഞ്ച്വറി നേടിയത്. 42 പന്തുകളില്‍ നിന്നാണ് ഇന്ത്യന്‍ നായകന്റെ അര്‍ദ്ധസെഞ്ച്വറി പൂര്‍ത്തിയാക്കിയത്.
24.1 ഓവറിലെത്തിയപ്പോഴാണ് മഴ പെയ്തത്. കോഹ്‌ലി എട്ടുറണ്‍സെടുത്തും രാഹുല്‍ 17 റണ്‍സ് നേടിയും പുറത്താവാതെ നിന്നു. 147 റണ്‍സാണ് ഇതുവരെ നേടിയത്.