ന്യൂഡൽഹി: പ്രധാനമന്ത്രി നരേന്ദ്രമോദിയുടെ ദർശനയീയമായ നേതൃത്വത്തിൽ ഇന്ത്യൻ റെയിൽവേ അഭൂതപൂർവമായ പരിവർത്തനത്തിന് സാക്ഷ്യം വഹിച്ചുവെന്ന് ബിജെപി ദേശീയ അദ്ധ്യക്ഷൻ ജെപി നദ്ദ. ഒമ്പത് വന്ദേ ഭാരത് എക്സ്പ്രസ് ട്രെയിനുകൾ രാജ്യത്തിന് സമർപ്പിച്ച പ്രധാനമന്ത്രിയ്ക്ക് ഹൃദയംഗമമായ നന്ദി അറിയിക്കാൻ താൻ ആഗ്രഹിക്കുന്നുവെന്നും നദ്ദ എക്‌സിൽ കുറിച്ചു.
ആത്മനിർഭർ ഭാരത് എന്ന ലക്ഷ്യം പൂർത്തീകരിക്കുന്നതിൽ രാജ്യത്തെ റെയിൽവേ പ്രധാന പങ്കുവഹിക്കുകയാണ്. റെയിൽവേയുടെ വികസനം രാജ്യത്തെ പുതിയ യുഗത്തിലേക്ക് നയിക്കുകയും വികസിത ഇന്ത്യ എന്ന പ്രധാനമന്ത്രിയുടെ ആഗ്രഹം സാക്ഷാത്കരിക്കാൻ സഹായിക്കുകയും ചെയ്യുന്നു. റെയിൽവേയുടെ അടിസ്ഥാനസൗകര്യങ്ങൾ നവീകരിക്കുന്നതിലും രാജ്യത്തെ ജനങ്ങൾക്ക് യാത്രാ സൗകര്യമൊരുക്കുന്നതിലും സർക്കാർ വലിയ പുരോഗതിയാണ് കൈവരിച്ചതെന്നും നദ്ദ പറഞ്ഞു.
കേരളത്തിന് അനുവദിച്ച രണ്ടാം വന്ദേഭാരത് എക്സ്പ്രസ് ട്രെയിൻ പ്രധാനമന്ത്രി നരേന്ദ്രമോദി ഇന്ന് വീഡിയോ കോൺഫറൻസിലൂടെ ഫ്‌ളാഗ് ഓഫ് ചെയ്തു. കാസർകോട് റെയിൽവേ സ്റ്റേഷനിൽ നടന്ന ചടങ്ങിൽ കേന്ദ്ര മന്ത്രി വി മുരളീധരൻ, ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ, ബിജെപി ദേശീയ നിർവാഹക സമിതി അംഗം പികെ കൃഷ്ണദാസ് എന്നിവരുൾപ്പെടെയുളള നേതാക്കൾ പങ്കെടുത്തു. കേരളമുൾപ്പെടെ 11 സംസ്ഥാനങ്ങൾക്ക് അനുവദിച്ച ഒമ്പത് വന്ദേഭാരത് ട്രെയിനുകളാണ് പ്രധാനമന്ത്രി ഇന്ന് ഫ്‌ളാഗ് ഓഫ് ചെയ്തത്.
