സെപ്റ്റംബർ 22-ന് വിൽപ്പന ആരംഭിച്ചതിന് പിന്നാലെ ഐഫോൺ സീരീസിന് ലഭിക്കുന്ന സ്വീകാര്യത വളരെ വലുതാണ്. മുമ്പുള്ള മോഡലുകളെ അപേക്ഷിച്ച് പുതിയ ഫീച്ചറുകൾ താരതമ്യേന കുറവാണെങ്കിലും ഫോണിന്റെ ഡിമാന്റ് വർദ്ധിച്ചതോടെ പ്രോ മോഡലുകൾ ലഭ്യമാകാത്ത സാഹചര്യമാണ് നിലവിലുള്ളത്. ടെസ്ലയുടെ തലവൻ ഇലോൺ മസ്ക് ഐഫോണിന്റെ പുതിയ സീരീസ് പുറത്തിറങ്ങുന്നതിന് മുമ്പായി ആപ്പിളിനെതിരെ രംഗത്ത് എത്തിയിരുന്നു. ക്യാമറയിൽ അല്ലാതെ മറ്റെന്ത് മാറ്റമാണ് പുതിയ ഐഫോണിൽ ആപ്പിൾ കൊണ്ടുവന്നതെന്ന് അദ്ദേഹം ചോദിച്ചിരുന്നു.
എന്നാൽ ഇപ്പോഴിതാ ഐഫോൺ 15 വാങ്ങാൻ താത്പര്യം അറിയിച്ച് രംഗത്തെത്തിയിരിക്കുകയാണ് മസ്ക്. ഫോട്ടോഗ്രാഫർമാരായ സ്റ്റീഫൻ വിൽക്സും റൂബൻ വുവും ഐഫോണിൽ പകർത്തിയ ചിത്രങ്ങൾ ആപ്പിളിന്റെ സിഇഒ ടിം കുക്ക് എക്സിൽ പങ്കുവെച്ചതിന് പിന്നാലെയായിരുന്നു താത്പര്യം പ്രകടിപ്പിച്ചത്.
”ലോക പ്രശസ്ത ഫോട്ടോഗ്രാഫർമാരായ സ്റ്റീഫൻ വിൽക്സും റൂബൻ വുവും ഐഫോൺ 15 പ്രോ മാക്സ് സ്വന്തമാക്കിയെങ്കിൽ ക്രിയേറ്റിവിറ്റി പരിധിയില്ലാത്തതാണെന്ന് ഉറപ്പാണ്. അവർ പകർത്തിയ ഗംഭീരമായ ചിത്രങ്ങൾ റോഡ് ഐലൻഡിലെ വേനൽക്കാലത്തെ ഭംഗിയും യൂട്ടാ മരുഭൂമിയും മനോഹരമായി കാണിക്കുന്നു.’-എന്നാണ് ടിം കുക്ക് കുറിച്ചത്. ഇതിന് മറുപടിയായാണ് മസ്ക് എക്സിൽ കുറിച്ചത്. ഞാൻ ഒരു ഐഫോൺ വാങ്ങുമെന്നായിരുന്നു മസ്ക് കുറിച്ചത്.
