അടുത്ത പത്ത് വർഷത്തിനകം ലോജിസ്റ്റിക് രംഗത്ത് വമ്പൻ തൊഴിലവസരങ്ങൾ സൃഷ്ടിക്കപ്പെടുമെന്ന് റിപ്പോർട്ട്. 10 ലക്ഷം തൊഴിലവസരങ്ങൾ മേഖല സൃഷ്ടിക്കുമെന്നാണ് വിലയിരുത്തൽ. 12% വാർഷിക വളർച്ച രേഖപ്പെടുത്തുന്ന സാഹചര്യത്തിലാണ് വരും വർഷങ്ങളിൽ കൂടുതൽ തൊഴിലുകൾ സൃഷ്ടിക്കാൻ ലോജിസ്റ്റിക് രംഗത്തിന് കഴിഞ്ഞേക്കുമെന്ന് വിദഗ്ധർ അഭിപ്രായപ്പെടുന്നത്.
രാജ്യത്തെ തുറമുഖ മേഖലയുടെ വളർച്ചയും വർദ്ധിത ഉത്പാദനവും മേഖലയ്ക്ക് പുത്തൻ ഉണർവ്വാണ് നൽകുന്നത്. പ്രൊഡക്ഷൻ-ലിങ്ക്ഡ് ഇൻസെന്റീവ് (പിഎൽഐ) സ്കീം, ആഭ്യന്തര ഉത്പാദനം, കയറ്റുമതി പ്രവർത്തനങ്ങൾ, ഉപഭോഗ ഘടനയിലെ മാറ്റങ്ങൾ, പണപ്പെരുപ്പ നിരക്ക് കുറയുന്നത്, സമീപകാല വ്യവസായ പരിഷ്കാരങ്ങൾ തുടങ്ങിയവയെല്ലാം മേഖലയുടെ വളർച്ചയെ കാര്യമായി സ്വാധീനിക്കുന്നു. മാത്രവുമല്ല അസംഘടിത മേഖലയിൽ നിന്ന് സംഘടിത മേഖലയിലേക്കുള്ള ചുവടുമാറ്റം ലോജിസ്റ്റിക് രംഗത്തിന്റ പുരോഗതിക്ക് ആക്കം കൂട്ടിയിരിക്കുകയാണ്.
രാജ്യത്തെ മെട്രോ നഗരങ്ങൾക്ക് പുറമേ ഇൻഡോർ, ഗുവാഹട്ടി, നാഗ്പൂർ, ജയ്പൂർ, വഡോദര, ലക്നൗ എന്നിവിടങ്ങളിലും അതിവേഗ വളർച്ചയാണ് ലോജിസ്റ്റിക് രംഗം കാണിക്കുന്നത്. ആർട്ടിഫിഷ്യൽ ഇന്റലിജൻസ്, മെഷ്യൻലേണിംഗ് തുടങ്ങിയവ മേഖലയെ ആശ്രയിക്കുന്നത് വലിയ തോതിൽ വർദ്ധിച്ചു വരുന്നു. ഇത് ലോജിസ്റ്റിക് പ്രവർത്തനങ്ങളെ കാര്യമായി സ്വാധീനിക്കുന്നു. സപ്ലൈ ചെയിൻ മാനേജർമാർ, ലോജിസ്റ്റിക് സ്പെഷ്യലിസ്റ്റുകൾ, വിതരണ മാനേജർമാർ, വെയർഹൗസിംഗ് മാനേജർമാർ എന്നിവ ഉൾപ്പെടെ നിരവധി ചുമതലകളാണ് മേഖല സൃഷ്ടിക്കുന്നത്. ഉത്പാദന ഉപഭോഗ മേഖലയിലെ ഇപ്പോൾ പ്രകടമാക്കിയിരിക്കുന്ന ഈ പുരോഗതി മേഖലയിൽ നിരവധി തൊഴിലുകൾ സൃഷ്ടിക്കുമെന്നാണ് സാമ്പത്തിക വിദഗ്ധർ കണക്കാക്കുന്നത്.
