വെറുതെ ഇരിക്കുമ്പോൾ കൈവിരലുകളുടെ ഞൊട്ടയൊടിക്കുക എന്നത് പലരുടെയും ശീലമാണ്. ചിലർക്ക് ഇത്തരത്തിൽ ഞൊട്ട ഒടിക്കുമ്പോൾ ടെൻഷൻ കുറഞ്ഞുകിട്ടും. മറ്റ് പലരും ഇതിന്റെ ശബ്ദം ഇഷ്ടപ്പെടുന്നവരാണ്.
ശരീരത്തിലെ വിരൽ ഉൾപ്പെടെയുള്ള ജോയിന്റുകൾ ചേരുന്നിടത്ത് ഉള്ള ഫ്ളൂയിഡാണ് സൈനോവിൽ ഫ്ളൂയിഡ്. ഇവ ജോയിന്റുകളുടെ ആരോഗ്യത്തിന് ഗുണകരമാണ്. ഇവയിൽ പലതരത്തിലുള്ള വാതകങ്ങളും അടങ്ങിയിട്ടുണ്ട്. ഞൊട്ടയൊടിക്കുമ്പോൾ ഫ്ളൂയിഡിലെ പ്രഷർ കുറയുകയും ഇത് വായു കുമിളകളായി മാറുകയും ചെയ്യുന്നതാണ് ശബ്ദമുണ്ടാകുന്നതിന് പിന്നിലെ കാരണം. ഈ കുമിളകൾ വീണ്ടും ഫ്ളൂയിഡിലേക്ക് അലിഞ്ഞ് ചേരുന്നതിന് ഏകദേശം 20 മിനിറ്റോളം സമയമെടുക്കും. ഇതിനാലാണ് ഇത്രയും സമയത്തിന് ശേഷം മാത്രം വീണ്ടും ശബ്ദമുണ്ടാകുന്നത്.ഷോൾഡറിൽ, കഴുത്ത് തിരിക്കുമ്പോൾ, കാൽമുട്ടുകൾ മടങ്ങുമ്പോൾ എല്ലാം ഇത്തരം ശബ്ദം കേൾക്കുന്നത് ഫ്ളൂയിഡ് മൂലമാണ്.
ഇത്തരം ശബ്ദം എല്ല് തേയ്മാനത്തിന് കാരണമായേക്കുമോ എന്ന ഭയം മിക്കവർക്കുമുണ്ട്. 50 വർഷത്തോളം സമയമെടുത്ത് അമേരിക്കയിലെ ഗവേഷകനായ ഡോകടർ ഡോണാൾഡ് അംഗർ ഇക് സംബന്ധിച്ച് പഠനം നടത്തി. പഠനത്തിന്റെ ഭാഗമായി അദ്ദേഹത്തിന്റെ ഇടത് കയ്യിൽ തുടർച്ചയായി ഞൊട്ടയൊടിച്ചു. 365000 തവണയാണ് അദ്ദേഹം ഞൊട്ടയൊടിച്ചത്. വലത് കയ്യിൽ ഒന്നും ചെയ്യാതിരിക്കുകയും ചെയ്തു. വർഷങ്ങൾക്ക് ശേഷം ഇത് സംബന്ധിച്ച് റിപ്പോർട്ട് സമർപ്പിച്ചു. ഇരുകയ്യിലെയും എല്ലുകൾ ഒരു പോലെയാണ്. അതായത് ഞൊട്ടയൊടിച്ചു എന്ന് കരുതി യാതൊരു മാറ്റവും ഉണ്ടാകില്ലെന്ന് റിപ്പോർട്ടിൽ പറയുന്നു.
