ഒമാൻ: ഒമാനിൽ നായർ ഫാമിലി യൂണിറ്റിയുടെ ഓണാഘോഷം നടന്നു. മസ്കറ്റിലെ റൂവി അൽഫലാജ് ഹോട്ടൽ ഗ്രാൻഡ് ഹാളിൽ വെച്ചാണ് ‘ചിങ്ങപോന്നോണം – 2023’ എന്ന് പേരിട്ട ഓണാഘോഷ പരിപാടി നടന്നത്. ഒമാനിലെ ഇന്ത്യൻ അംബാസിഡർ എച്ച്ഇ അമിത് നാരാംഗും നടൻ സൈജു കുറുപ്പുമായിരുന്നു വിശിഷ്ട അതിഥിയായി പരിപാടിയിൽ പങ്കെടുത്തത്.
ഭാരത കേസരി പ്രതിഭാ പുരസ്കാരം-2023 സൈജു കുറുപ്പിന് നായർ ഫാമിലി യൂണിറ്റി മസ്കറ്റ് പ്രസിഡന്റ് ശ്രീ. സുകുമാരൻ നായർ കൈമാറി. സംസ്കാരിക തനിമയും, പൈതൃകവും വിളിച്ചോതുന്ന നിരവധി കലാപരിപാടികൾ ചടങ്ങിലുണ്ടായിരുന്നു. പാചക കുലപതി ശ്രീ. പഴയിടം മോഹനൻ നമ്പൂതിരിയുടെ നേതൃത്വത്തിലായിരുന്നു വിഭവ സമൃദ്ധമായ ഓണ സദ്യ തയ്യാറാക്കിയത്.
2000-ലധികം പേർ ഓണാഘോഷത്തിൽ പങ്കെടുത്തു. സംഘാടക മികവുകൊണ്ടും, ജനസാന്നിധ്യം കൊണ്ടും ഓണാഘോഷം കൂടുതൽ ആകർഷകമായി. ‘മാളികപ്പുറം’സിനിമയെ കുറിച്ചുള്ള കുട്ടികളുടെ ചോദ്യങ്ങൾക്ക് സൈജു കുറുപ്പിന്റെ മറുപടികൾ ചടങ്ങിൽ പ്രത്യേക ശ്രദ്ധയാകർഷിച്ചിരുന്നു.