ലക്നൗ: ഡൽഹിക്ക് ‘DEL’, ബെംഗളൂരുവിന് ‘BLR’, കൊച്ചിക്ക് ‘COK’ എന്നിങ്ങനെ എയർപോർട്ടുകൾ മൂന്നക്ക കോഡുകളിൽ അറിയപ്പെടാറുണ്ട്. അതുപോലെ നോയിഡ അന്താരാഷ്‌ട്ര വിമാനത്താവളത്തിനും വ്യത്യസ്തമായ വ്യോമയാന കോഡ് ലഭിച്ചിരിക്കുകയാണ്. ഡിഎക്‌സ്എൻ (DXN) എന്ന കോഡാണ് അന്താരാഷ്‌ട്ര എയർ ട്രാൻസ്‌പോർട്ട് അസോസിയേഷൻ (IATA) നോയിഡാ വിമാനത്താവളത്തിന് അനുവദിച്ചിരിക്കുന്നത്. ഇന്റർ നാഷണൽ എയർപോര്ട്ട് അസോസിയേഷൻ (IATA) ലോകത്തിലെ എയർലൈനുകളുടെ ട്രേഡ് അസോസിയേഷനാണ്.
മറ്റ് എയർപോർട്ടുകളുടേത് പോലെ സാങ്കേതികമായ ഒരു ചുരുക്കപ്പേരല്ല DXN എന്നത്. നോയിഡ വിമാനത്താവളത്തിന്റെ സ്ഥാനവും ലക്ഷ്യവും സൂചിപ്പിക്കുന്നതാണ് DXN. അതായത് ഡൽഹി-NCRന്റെ രണ്ടാമത്തെ സിവിൽ ഏവിയേഷൻ ഹബ്ബ് എന്ന നിലയിൽ – ഡൽഹിയിലെ ‘D’ ആദ്യത്തെ അക്ഷരമാകുന്നു. നോയിഡയുടെ ‘N’ അവസാനത്തെ അക്ഷരവും. ദേശീയ-അന്തർദേശീയ കണക്റ്റിവിറ്റിയെ സൂചിപ്പിക്കുന്നതാണ് X. അപ്രകാരമാണ് നോയിഡ വിമാനത്താവളത്തിന് DXN എന്ന ചുരുക്കപ്പേര് IATA നിർദ്ദേശിച്ചത്.
അന്താരാഷ്‌ട്ര യാത്രാ ഏജൻസികൾ വിമാനത്താവളത്തെ തിരിച്ചറിയുന്നതിന് ഈ മൂന്നക്ക കോഡായിരിക്കും ഉപയോഗിക്കുക. വിമാനത്താവളം കൂടുതൽ വളർച്ച കൈവരിക്കുന്നതിന്റെ ഭാഗമായാണ് കോഡ് അനുവദിക്കപ്പെട്ടതെന്നും നോയിഡ എയർപോർട്ട് ചെയർമാൻ ക്രിസ്‌റ്റോഫ് ഷെൽമാൻ അഭിപ്രായപ്പെട്ടു. നോയിഡാ വിമാനത്താവളം പുരോഗമിക്കുന്നതിനും സജ്ജമാകുന്നതിലും നൽകിയ അംഗീകരമാണിതെന്ന് അദ്ദേഹം കൂട്ടിച്ചേർത്തു. ടിക്കറ്റുകൾ ബുക്ക് ചെയ്യുന്നതിലും ബാഗേജുകൾ, ടിക്കറ്റുകൾ എന്നിവ തിരിച്ചറിയുന്നതിലും പുതിയ മൂന്നക്ക കോഡ് സഹായകരമാകും.
ഉത്തർപ്രദേശിലെ ഗൗതം ബുദ്ധ നഗർ ജില്ലയിലെ ജെവാറിൽ ഉടൻ പ്രവർത്തനമാരംഭിക്കാൻ ഒരുങ്ങുന്ന ഗ്രീൻഫീൽഡ് വിമാനത്താവളമാണ് നോയിഡാ അന്താരാഷ്‌ട്ര വിമാനത്താവളം. ഇത് ഡൽഹി NCR, നോയിഡാ, പശ്ചിമ ഉത്തർ പ്രദേശ് എന്നിവിടങ്ങളിലേക്കുള്ള കണക്ടിവിറ്റി വർദ്ധിപ്പിക്കും. സൂറിച്ച് അന്താരാഷ്‌ട്ര വിമാനത്താവളത്തിന്റ ഉടമസ്ഥതയിലുള്ള യമുന അന്താരാഷ്‌ട്ര എയർപോർട്ട് ലിമിറ്റഡിന്റയും ഉത്തർപ്രദേശ് ഗവൺമെന്റിന്റെയും സഹകരണത്തോടെയാണ് നോയിഡാ വിമാനത്താവളത്തിന്റെ നിർമ്മാണം.
