തിരുവനന്തപുരം: ആരോഗ്യമന്ത്രിയുടെ വീണാ ജോർജിന്റെ ഓഫീസിനെതിരായ കൈക്കൂലി കേസിൽ പോലീസ് കൂടുതൽ തെളിവുകൾ ശേഖരിക്കും. സെക്രട്ടറിയേറ്റ് അനക്‌സ് ടൂ കെട്ടിടത്തിന് സമീപമുള്ള സിസിടിവി ദൃശ്യങ്ങളെ ആശ്രയിച്ച് ആയിരിക്കും ഇനി കേസ് മുന്നോട്ടുപോകുക. മെഡിക്കൽ ഓഫീസർ നിയമനത്തിനായി കോഴ വാങ്ങി എന്ന വിവാദത്തിലാണ് ആൾമാറാട്ടം നടന്നിട്ടുണ്ടോ എന്ന ഒരു ദിശയിലേക്ക് കൂടി പോലീസ് അന്വേഷണത്തെ കൊണ്ടുപോകുന്നത്.
ആരോഗ്യവകുപ്പ് മന്ത്രി വീണാ ജോർജിന്റെ പേഴ്‌സണൽ സെക്രട്ടറി അഖിൽ മാത്യു പണം വാങ്ങി എന്ന് പറയുന്ന ദിവസം എവിടെയായിരുന്നു എന്ന വിവരങ്ങൾ ശേഖരിക്കാനായി പോലീസ് സിസിടിവി ദൃശ്യങ്ങൾ ആവശ്യപ്പെട്ടിരുന്നു. പൊതുഭരണ വകുപ്പിൽ നിന്നും സിസിടിവി ദൃശ്യങ്ങൾ ലഭിച്ചാൽ അഖിൽ മാത്യുവിനെതിരെ അന്വേഷണം നടത്തും. എന്നാൽ പണം വാങ്ങി എന്നു പറയുന്ന ദിവസം അഖിൽ മാത്യു പത്തനംതിട്ടയിലാണ് എന്ന് തെളിയിക്കുന്ന ദൃശ്യങ്ങൾ പോലീസിന് ലഭിച്ചിട്ടുണ്ട്. കാഴ്ചയ്‌ക്ക് പരിമിതി ഉള്ളതായി ഹരിദാസ് തന്നെ പോലീസിന് മൊഴി നൽകിയിട്ടുണ്ട്. ഏപ്രിൽ 9,10,11 തീയതികളിൽ സിസിടിവി ദൃശ്യങ്ങളിൽ നിന്നുമാണ് പോലീസ് കൂടുതൽ വിവരങ്ങൾ ശേഖരിക്കുക.
അതേസമയം ഹരിദാസിൽ നിന്നും പണം വാങ്ങിയത് ആൾമാറാട്ടം നടത്തിയാണോ എന്നും പോലീസ് സംശയിക്കുന്നുണ്ട്. സെക്രട്ടറിയേറ്റിന്റെ അനുബന്ധ കെട്ടിടത്തിന് സമീപത്ത് വെച്ചാണ് അഖിൽ മാത്യു കൈക്കൂലി വാങ്ങിയതെന്നാണ് പരാതിക്കാരൻ ആയ ഹരിദാസ് പോലീസിൽ മൊഴി നൽകിയിട്ടുള്ളത്.ഇതിനോടകം തന്നെ അഖിൽ മാത്യുവിന്റെ ഫോൺ വിളി വിശദാംശങ്ങളും ബാങ്ക് അക്കൗണ്ടിന്റെ ഡാറ്റകളും പോലീസ് ശേഖരിച്ചിട്ടുണ്ട്.
