നോക്കിയയുടെ 6ജി ലാബ് കേന്ദ്ര ടെലികോം മന്ത്രി അശ്വിനി വൈഷ്ണവ് ഉദ്ഘാടനം നിർവഹിച്ചു. ഫിന്നിഷ് ടെലികമ്മ്യൂണിക്കേഷൻ ഉപകരണ നിർമ്മാതാക്കളായ നോക്കിയ ബെംഗളൂരുവിലെ ആഗോള ഗവേഷണ വികസന കേന്ദ്രത്തിൽ 6ജി ലാബ് സ്ഥാപിക്കുമെന്ന് പ്രഖ്യാപിച്ചു. നോക്കിയയുടെ 6ജി റിസർച്ച് ലാബിന്റെ ഉദ്ഘാടനം രാജ്യത്തെ ഒരു ഇന്നോവേഷൻ ഹബ്ബാക്കി മാറ്റുന്നതിന് പ്രധാന മന്ത്രി നരേന്ദ്ര മോദിയുടെ വീക്ഷണവുമായി ബന്ധപ്പെട്ടിരിക്കുന്നുവെന്ന് അദ്ദേഹം ഊന്നിപ്പറഞ്ഞു.
വ്യവസായങ്ങളുടെയും സമൂഹത്തിന്റെയും ഭാവി ആവശ്യങ്ങൾ നിറവേറ്റുക എന്നതാണ് 6ജി സാങ്കേതിത വിദ്യ ലക്ഷ്യം വെക്കുന്നത്. കഴിഞ്ഞ മാസം ജനീവയിൽ നടന്ന യോഗത്തിൽ 6ജി ടെക്നോളജി കവറേജിനുള്ള ഇന്ത്യയുടെ നിർദ്ദേശം യുഎൻ ബോഡി ഐടിയുവിന്റെ പഠന സംഘം അംഗീകരിക്കുകയായിരുന്നു. ഇത് സാങ്കേതിക വിദ്യയുടെ അടുത്ത തലമുറയുടെ വികസനത്തിന് ആവശ്യമായ ചിലവ് കുറയ്ക്കുമെന്നാണ് പ്രതീക്ഷ.
ടെലികോം ഡിപ്പാർട്ട്മെന്റ് പിന്തുണയ്ക്കുന്ന വ്യവസായങ്ങളും അക്കാദമിയും തമ്മിലുള്ള സഹകരണത്തിലൂടെ 200-ൽ അധികം പേറ്റന്റുകൾ സ്വന്തമാക്കിയിട്ടുണ്ട്. ഇതിനാൽ തന്നെ ഇന്ത്യ ഇതിനോടകം 6ജി സാങ്കേതിക വിദ്യയിൽ ഗണ്യായ മുന്നേറ്റം നടത്തിയിട്ടുണ്ട്. നോക്കിയയുടെ ചീഫ് സ്ട്രാറ്റജി ആൻഡ് ടെക്നോളജി ഓഫീസർ നിശാന്ത് ബത്ര കേന്ദ്രസർക്കാരിന്റെ ഭാരത് 6ജി വിഷൻ സാക്ഷാത്കരിക്കുന്നതിനുള്ള കമ്പനിയുടെ പ്രതിബദ്ധത വ്യക്തമാക്കി.
