ബ്രോഡ്ബാൻഡ് വഴിയും കേബിളുകൾ വഴിയും, ടെലകോം ടവറുകൾ വഴിയും നൽകിയിരുന്ന ഇന്റർനെറ്റ് ഇനി നേരിട്ട് സ്മാർട്ട് ഫോണുകളിലേക്ക് എത്തിക്കൻ ഒരുങ്ങി ഇലോൺ മസ്ക്. ഡയറക്ട്-ടു-സെൽ പദ്ധതിയുമായി അദ്ദേഹത്തിന്റെ ഉടമസ്ഥതയിലുള്ള കമ്പനിയായ സ്റ്റാർലിങ്ക് എത്തിയിരിക്കുകയാണ്. 2024 ൽ അമേരിക്കയിൽ പദ്ധതി ആരംഭിക്കുമെന്നാണ് റിപ്പോർട്ടുകൾ. ഇതുവഴി മൊബൈൽ ഫോണുകളിലേക്ക് നേരിട്ട് നെറ്റ്വർക്ക് എത്തുകയും എല്ലാ പ്രദേശങ്ങളിലും മികച്ച സേവനം ലഭ്യമാക്കാൻ സ്റ്റാർലിങ്കിന് കഴിയുമെന്നുമാണ് കമ്പനിയുടെ അവകാശവാദം.
എക്സിനു കീഴിൽ പ്രവർത്തിക്കുന്ന സ്റ്റാർലിങ്ക് ഇതുമായി ബന്ധപ്പെട്ട വിവരങ്ങൾ ഉൾപ്പെടുത്തി വെബ് പേജ് ആരംഭിച്ചിട്ടുണ്ട്. ആദ്യം എസ്എംഎസ് മാത്രമായിരിക്കും ഈ നെറ്റ്വർക്ക് ഉപയോഗിച്ച് ചെയ്യാനാവുക. 2025 ഓടെ ഫോൺകോളുകൾ നടത്താനാവും. ഇന്റർനെറ്റ് എത്താത്ത എല്ലാ പ്രദേശങ്ങളിലും നെറ്റ് എത്തിക്കുക എന്ന ലക്ഷ്യത്തോടെയാണ് സ്റ്റാർലിങ്ക് ഈ പദ്ധതിക്ക് തുടക്കമിടുന്നത്. വെബ് ബ്രൗസിങ്ങിന് ഉപകാരമാവുന്ന രീതിയിലാണ് ഈ സങ്കേതിക വിദ്യയെ വികസിപ്പിച്ചെടുക്കുന്നത്.
അമേരിക്കൻ ഫെഡറൽ കമ്മ്യൂണിക്കേഷൻസ് കമ്മീഷന്റെ അനുമതി കിട്ടിയാൽ മാത്രമേ പദ്ധതി നടപ്പിലാക്കാനാവൂ. അതിനായി കമ്പനി ശ്രമിച്ച് കൊണ്ടിരിക്കുകയാണെന്നാണ് സൂചന. ആഗോളതലത്തിലുള്ള ടെലകോം കമ്പനികളുടെ സഹകരണം ലഭിക്കാനും സ്റ്റാർലിങ്ക് ശ്രമിക്കുന്നുണ്ട്.
