തൊപ്പിക്കെതിരെ ലുക്ക് ഔട്ട് സർക്കുലർ; വിദേശത്തേക്ക് കടക്കാൻ സാധ്യത, ഒളിവിലുള്ള യൂട്യൂബറെ തേടി പൊലീസ്
കൊച്ചി: സുഹൃത്തുക്കളുടെ സ്വകാര്യവും നഗ്നവുമായ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിച്ചെന്ന കേസിൽ യൂട്യൂബർ ‘തൊപ്പി’ എന്ന മുഹമ്മദ് നിഹാദിനെതിരെ പൊലീസ് ലുക്ക് ഔട്ട് സർക്കുലർ പുറത്തിറക്കി. വിദേശത്തേക്ക് കടക്കാൻ സാധ്യതയുണ്ടെന്ന രഹസ്യവിവരത്തിന്റെ അടിസ്ഥാനത്തിലാണ് നടപടി. നിഹാദിന്റെ പാസ്പോർട്ട് വിവരങ്ങൾ ഇതിനകം ശേഖരിച്ചിട്ടുണ്ടെന്നും വിമാനത്താവളങ്ങൾ ഉൾപ്പെടെ എല്ലാ ഇമിഗ്രേഷൻ കേന്ദ്രങ്ങൾക്കും ജാഗ്രതാ നിർദേശം നൽകിയിട്ടുണ്ടെന്നും പൊലീസ് വൃത്തങ്ങൾ അറിയിച്ചു.
എറണാകുളം റൂറൽ സൈബർ പൊലീസാണ് കേസിൽ അന്വേഷണം നടത്തുന്നത്. സുഹൃത്തുക്കളുമായുണ്ടായ തർക്കത്തിന് പിന്നാലെ അവരുടെ നഗ്നദൃശ്യങ്ങൾ യൂട്യൂബ് ലൈവിലൂടെയും മറ്റ് സമൂഹമാധ്യമ അക്കൗണ്ടുകളിലൂടെയും പ്രചരിപ്പിച്ചെന്നാണ് കേസ്. ഐടി നിയമപ്രകാരവും മറ്റ് അനുബന്ധ വകുപ്പുകൾ പ്രകാരവുമാണ് കേസെടുത്തിരിക്കുന്നത്.
ചോദ്യം ചെയ്യലിന് ഹാജരാകാൻ പൊലീസ് നോട്ടീസ് നൽകിയപ്പോൾ ആരോഗ്യപ്രശ്നങ്ങൾ ചൂണ്ടിക്കാട്ടിയാണ് നിഹാദ് മറുപടി നൽകിയത്. എന്നാൽ പിന്നീട് അന്വേഷണവുമായി സഹകരിക്കാതെ ഒളിവിൽ പോവുകയായിരുന്നു. രണ്ടാം നോട്ടീസിനും മറുപടി ലഭിക്കാതിരുന്നതോടെയാണ് ഇയാൾ രാജ്യം വിടാൻ ശ്രമിച്ചേക്കാമെന്ന നിഗമനത്തിൽ പൊലീസ് ലുക്ക് ഔട്ട് സർക്കുലർ പുറത്തിറക്കിയത്. മൊഴിയെടുക്കാൻ നോട്ടീസ് നൽകിയ നിഹാദിന്റെ സുഹൃത്തുക്കളും ഇതുവരെ അന്വേഷണ സംഘത്തിന് മുന്നിൽ ഹാജരായിട്ടില്ല.
കേസുമായി ബന്ധപ്പെട്ട് നിഹാദിന്റെ പ്രധാന ചാനൽ പൊലീസ് സമർപ്പിച്ച റിപ്പോർട്ടിന്റെ അടിസ്ഥാനത്തിൽ യൂട്യൂബ് നീക്കം ചെയ്തിരുന്നു. പ്രതി സമർപ്പിച്ച മുൻകൂർ ജാമ്യാപേക്ഷയെ എറണാകുളം സെഷൻസ് കോടതിയിൽ പൊലീസ് ശക്തമായി എതിർക്കുകയും, പ്രതിക്കെതിരെയുള്ള ആരോപണങ്ങൾ ഗുരുതര സ്വഭാവമുള്ളതാണെന്ന് കോടതിയെ അറിയിക്കുകയും ചെയ്തിട്ടുണ്ട്. ലഹരിമരുന്ന് ഉപയോഗം, അശ്ലീല ദൃശ്യങ്ങളുടെ പ്രചാരണം, പ്രായപൂർത്തിയാകാത്തവരെ ചൂഷണം ചെയ്തെന്ന ആരോപണം ഉൾപ്പെടെ വിവിധ പരാതികളിലും അന്വേഷണം പുരോഗമിക്കുകയാണ്.
ഇതിനിടെ, തൊപ്പിയുടെ അടുത്ത കൂട്ടാളിയായ യൂട്യൂബർ മമ്മു (മുഹമ്മദ്) മഞ്ചേരി പൊലീസിന്റെ മറ്റൊരു കേസിൽ അറസ്റ്റിലായി. സമൂഹമാധ്യമത്തിലെ ലൈവ് സ്ട്രീമിനിടെ യുവതിയെ അപമാനിക്കുകയും അധിക്ഷേപപരമായ പരാമർശങ്ങൾ നടത്തുകയും ചെയ്തെന്ന പരാതിയിലാണ് അറസ്റ്റ്. ഈ കേസിൽ തൊപ്പി ഒന്നാം പ്രതിയും മമ്മു നാലാം പ്രതിയുമാണ്. മുഹമ്മദ് ഷമീർ, ജാസി എന്നിവരും പ്രതിപ്പട്ടികയിലുണ്ട്. കോടതിയിൽ ഹാജരാക്കിയ മമ്മുവിനെ റിമാൻഡ് ചെയ്തിട്ടുണ്ട്.
