വാഹനങ്ങൾ തമ്മിലുള്ള കൂട്ടിയിടികൾക്ക് പരിഹാരം കണ്ടെത്താൻ മൊബൈൽ സാങ്കേതിക വിദ്യകൾക്ക് ആയിരുന്നെങ്കിലെന്ന് നമ്മൾ പലപ്പോഴും ചിന്തിച്ചിട്ടുണ്ടാകും. ഇപ്പോഴിതാ ലോകം 6ജി കണക്ടിവിറ്റിയിലേക്ക് ചുവടു വെക്കുമ്പോൾ
ഇതും സാധ്യമാകുമെന്ന് വ്യക്തമാക്കുകയാണ് നോക്കിയ.
മനുഷ്യന്റെ ആറ് ഇന്ദ്രിയങ്ങൾക്ക് സമമായി പ്രവർത്തിക്കാനാകുന്ന 6ജി റേഡിയോ ഉപകരണമാണ് നോക്കിയ അവതരിപ്പിച്ചിരിക്കുന്നത്. ട്രാൻസ്മിറ്ററും റിസീവറും ചേർന്ന ഉപകരണത്തിലൂടെ നെറ്റ്വർക്കിനെ സെൻസറുകളാക്കി മാറ്റുന്ന പ്രക്രിയയാണ് റേഡിയോ ചെയ്യുന്നത്.
വസ്തുക്കളുടെ അകലവും സ്ഥാനവും വേഗതയും തിരിച്ചറിയുന്നതിന് ഇത് സഹായകമാകും. കൂടാതെ ഇതിൽ നിന്നും ലഭിക്കുന്ന വിവരങ്ങൾക്ക് അനുസൃതമായി നടപടിയെടുക്കാനും ഈ ഉപകരണം സഹായിക്കുമെന്ന് നോക്കിയയുടെ ബെംഗളൂരുവിലെ ഗവേഷണ വിഭാഗം ഡയറക്ടർ പൊന്നി കൃഷ്ണമൂർത്തി വ്യക്തമാക്കി.
വാഹനങ്ങളിൽ 6ജി സാങ്കേതിക വിദ്യ ഉപയോഗിക്കുന്ന ഉപകരണങ്ങൾ യാഥാർത്ഥ്യമാകുന്നതോടെ
കൂട്ടിയിടി ഉൾപ്പെടെയുള്ള അപകടങ്ങൾ മുൻകൂട്ടി മനസിലാക്കി ഓട്ടോമാറ്റിക്കായി ബ്രേക്ക് ചെയ്യാനാകും. സെക്കൻഡിന്റെ നൂറിൽ ഒരംശം സമയംകൊണ്ട് അപകടസാധ്യതകൾ മുൻകൂട്ടികണ്ട് മനസിലാക്കി നടപടിയെടുക്കാൻ സഹായകമാകുന്ന തരത്തിലാണ് റേഡിയോയെന്ന് നോക്കിയയുടെ 6ജി ഗവേഷണത്തിൽ പ്രധാന പങ്കു വഹിക്കുന്ന എം അരുശു വ്യക്തമാക്കി.
