ദീപാവലി ആഘോഷങ്ങളുടെ നിറവിലാണ് രാജ്യം. പടക്കം പൊട്ടിച്ചും പൂത്തിരി കത്തിച്ചും ആഘോഷങ്ങൾ പൊടി പൊടിക്കുകയാണ്. എന്നാൽ ഇതിൽ നിന്നും വ്യത്യസ്തമായൊരു ദീപാവലി ആഘോഷമുള്ള ഒരു ഗ്രാമമുണ്ട്. ഇവിടുത്തെ നൂറോളം കുടുംബങ്ങളാണ് വ്യത്യസ്തമായ രീതിയിൽ ദീപാവലി ആഘോഷിക്കുന്നത്. നിശബ്ദമായി ദീപാവലി ആഘോഷിക്കുന്നവരാണ് ഈ ഗ്രാമത്തിലുള്ളവർ.
തമിഴ്‌നാട് ധർമപുരി ജില്ലയിലെ പാലക്കോട് ബല്ലേനഹള്ളി ഗ്രാമത്തിലാണ് വിചിത്രമായ രീതിയിൽ നിശബ്ദമായി ദീപാവലി ആഘോഷിക്കുന്നത്. എന്നാൽ തൊട്ടടുത്ത നഗരങ്ങളിലും ഗ്രാമങ്ങളിലും ജില്ലകളിലുമെല്ലാം കാതടിപ്പിക്കുന്ന ശബ്ദകോലാഹലങ്ങളോടെ പടക്കം പൊട്ടിച്ചും ആരവത്തോടെയുമാണ് ദീപാവലി ആഘോഷിക്കുന്നത്. ബല്ലേനഹള്ളി ഗ്രാമത്തിൽ എത്തുമ്പോൾ ഇതൊന്നുമില്ല. ഗ്രാമത്തിലെ നൂറോളം കുടുംബങ്ങൾ ഒത്തൊരുമിച്ച് എടുത്ത തീരുമാനമാണിത്.
ഗ്രാമത്തിലെ മുനിയപ്പൻ ക്ഷേത്രത്തിനോട് ചേർന്ന് നിൽക്കുന്ന ആൽമരത്തിലും പുളിമരത്തിലും നിരവധി വവ്വാലുകളാണ് വസിക്കുന്നത്. ആയിരക്കണക്കിന് വവ്വാലുകളാണ് ഇവിടെയുള്ളത്. ഇതിനാൽ തന്നെ സഹജീവികളോടുള്ള സ്‌നേഹം കണക്കിലെടുത്താണ് ഇവയെ ബുദ്ധിമുട്ടിക്കേണ്ട എന്ന തീരുമാനത്തിൽ ഗ്രാമവാസികൾ എത്തിയത്. ഗ്രാമത്തിലെ ഓരോ കുടുംബങ്ങളെയും പോലെ തന്നെയാണ് ബല്ലേനഹള്ളിയിൽ ഉള്ളവർക്ക് വവ്വാലുകളും.
