ഇടുക്കി: ദേശാഭിമാനിയുടെ ഖേദപ്രകടനം തള്ളി മറിയക്കുട്ടി. തനിക്കെതിരെ ഉണ്ടായ സൈബർ ആക്രമണത്തിനെതിരെ നിയമ നടപടിയുമായി മുന്നോട്ട് പോകുമെന്ന് മറിയക്കുട്ടി വ്യക്തമാക്കി. തന്റെ പേരിൽ ഉണ്ടെന്ന രീതിയിൽ പ്രചരിപ്പിച്ച സ്ഥലം വേണമെന്നും മറിയക്കുട്ടി പറയുന്നു. വ്യാജ വാർത്തയിൽ നിയമ നടപടി സ്വീകരിക്കുമെന്ന് മറിയക്കുട്ടി ഇന്നലെ വ്യക്തമാക്കിയിരുന്നു. ഇതിന് പിന്നാലെയാണ് വ്യാജ വാർത്തയിൽ സിപിഎം മുഖപത്രം ഖേദപ്രകടനം നടത്തിയത്.
ദേശാഭിമാനിയിൽ വാർത്ത വന്നതിന് പിന്നാലെ മറിയക്കുട്ടിക്കെതിരെ വ്യാപക സൈബർ ആക്രമണം നടന്നിരുന്നു. മറിയക്കുട്ടി താമസിക്കുന്ന വീടും പുരയിടവും ഇളയ മകളുടെ പേരിലുള്ളതാണെന്നും, ഈ മകൾ വിദേശത്താണെന്ന രീതിയിൽ പ്രസിദ്ധീകരിച്ച വാർത്തയിൽ പിശക് സംഭവിച്ചുവെന്നുമാണ് വിശദീകരണം. അത്തരത്തിലൊരു വാർത്ത വന്നതിൽ ഖേദിക്കുന്നുവെന്നും സിപിഎം മുഖപത്രത്തിൽ പറയുന്നു.
വ്യാജ വാർത്തയ്ക്കെതിരെ ഹൈക്കോടതിയെ സമീപിക്കുമെന്നാണ് മറിയക്കുട്ടി അറിയിച്ചിരിക്കുന്നത്. തന്റെ പേരിൽ വ്യാജ വാർത്ത കൊടുത്ത പത്രം നാട്ടിൽ എല്ലായിടത്തും പ്രചരിച്ചുവെന്നും, തന്നേയും മക്കളേയും അപമാനിച്ചതിന്റെ നഷ്ടപരിഹാരം ലഭിക്കണമെന്നും മറിയക്കുട്ടി ആവശ്യപ്പെട്ടു.
