മുംബൈ: വാങ്കഡെ സ്റ്റേഡിയത്തിൽ നടന്ന ഇന്ത്യ- ന്യൂസിലാൻഡ് ലോകകപ്പ് സെമി പോരാട്ടത്തിൽ ആരാധകരെ ത്രസിപ്പിച്ച് ഇംഗ്ലണ്ടിന്റെ ഫുട്ബോൾ ഇതിഹാസം ഡേവിഡ് ബെക്കാമും മാസ്റ്റർ ബ്ലാസ്റ്ററിനൊപ്പം ഗ്യാലറിയിൽ ഉണ്ടായിരുന്നു. വിരാട് കോലി ചരിത്ര നേട്ടം കൈവരിച്ചപ്പോൾ തിങ്ങി നിറഞ്ഞ സ്റ്റേഡിയത്തിലെ ആഘോഷത്തിൽ ബെക്കാമും പങ്കുചേർന്നു. എന്നാൽ ഇതിനെല്ലാം അപ്പുറം സമൂഹമാദ്ധ്യമങ്ങളിൽ വൈറലായിരിക്കുന്നത് ഇന്ത്യൻ നായകൻ രോഹിത് ശർമ്മയുടെയും ബെക്കാമിന്റെയും ചിത്രങ്ങളാണ്. ഇന്ത്യൻ നായകനെ കണ്ടതിൽ അതിയായ സന്തോഷം, ഫൈനലിന് എല്ലാവിധ ആശംസകളും എന്ന അടിക്കുറിപ്പോടെ ബെക്കാമാണ് ഈ ചിത്രം ഫേസ്ബുക്കിൽ പങ്കുവച്ചത്.
ഡേവിഡ് ബെക്കാം ടീം ഇന്ത്യയുടെ ജഴ്സി ധരിച്ചപ്പോൾ രോഹിത് ശർമ്മ റയൽ മാഡ്രിഡിന്റെ ജഴ്സിയാണ് ധരിച്ചത്. റയൽ മാഡ്രിഡ് ജഴ്സിയിൽ ബെക്കാം 23 എന്നും ഇന്ത്യൻ ജഴ്സിയിൽ രോഹിത്ത് 45 എന്നും എഴുതിയിട്ടുണ്ട്. ഇരുവരും തമ്മിലുളള കൂടിക്കാഴ്ചയിൽ പരസ്പരം കൈമാറിയ ജേഴ്സികളായിരുന്നു ഇത്. രണ്ട് താരങ്ങളും ജഴ്സി ധരിച്ച നിൽക്കുന്ന ചിത്രത്തിന് താഴെ കമന്റുകളുമായി ആരാധകരുമുണ്ട്.