കേന്ദ്ര പോലീസ് സേനകളിലെ 26,146 കോൺസ്റ്റബിൾ തസ്തികകളിലേക്ക് അപേക്ഷ ക്ഷണിച്ചു. ഉദ്യോഗാർത്ഥികൾക്ക് ഡിസംബർ 31 വരെ അപേക്ഷിക്കാവുന്നതാണ്. ആഭ്യന്തരമന്ത്രാലയം സ്റ്റാഫ് സെലക്ഷൻ മുഖേനയാണ് കേന്ദ്ര പോലീസ് സേനയിലേക്ക് ഉദ്യോഗാർത്ഥികളെ തിരഞ്ഞെടുക്കുന്നത്. പത്താം ക്ലാസ് പാസായവർക്ക് സേനയിലേക്ക് അപേക്ഷിക്കാവുന്നതാണ്. ssc.nic.in എന്ന വെബ്സൈറ്റിൽ ഒറ്റത്തവണ രജിസ്ട്രേഷനിലൂടെ ഓൺലൈൻ മുഖേന അപേക്ഷ സമർപ്പിക്കാം.
കമ്പ്യൂട്ടർ അധിഷ്ഠിത പരീക്ഷ, ഫിസിക്കൽ എഫിഷ്യൻസി ടെസ്റ്റ്, ഫിസിക്കൽ സ്റ്റാൻഡേർഡ് ടെസ്റ്റ്, മെഡിക്കൽ ടെസ്റ്റ് എന്നിവയുടെ അടിസ്ഥാനത്തിലാകും ഉദ്യോഗാർത്ഥികളെ തിരഞ്ഞെടുക്കുക. ആദ്യ ഘട്ടത്തിൽ കമ്പ്യൂട്ടർ അധിഷ്ഠിത ഒബ്ജക്ടീവ് ടൈപ്പ് പരീക്ഷയാണ് നടക്കുന്നത്. ഇതിൽ രണ്ട് മാർക്ക് വീതമുള്ള 80 ചോദ്യങ്ങളുണ്ടാകും. പരീക്ഷാ സമയം ഒരു മണിക്കൂറാണ്. ഓരോ ചോദ്യോത്തരങ്ങൾക്കും നെഗറ്റീവ് മാർക്ക് ഉണ്ടാകും. ഒരു ഉത്തരം തെറ്റുകയാണ് എങ്കിൽ 0.25 മാർക്ക് കുറയ്ക്കുന്നതായിരിക്കും. ഫെബ്രുവരി അല്ലെങ്കിൽ മാർച്ച് മാസത്തിലാകും ഓൺലൈൻ പരീക്ഷ നടക്കുന്നത്.
ഇംഗ്ലീഷ്, ഹിന്ദി ഭാഷകൾക്ക് പുറമെ മലയാളം ഉൾപ്പെടെ 13 പ്രാദേശിക ഭാഷകളിലും പരീക്ഷ എഴുതാനാകും. കേരളത്തിൽ എറണാകുളം, കൊല്ലം, കോട്ടയം, കോഴിക്കോട്, തിരുവനന്തപുരം, തൃശൂർ എന്നീ ജില്ലകളിൽ പരീക്ഷാ കേന്ദ്രങ്ങളുണ്ട്.
ആകെ ഒഴിവുകൾ : 26,146 (BSF-6174, CISF- 11025, CRPF- 3337, SSB- 635 ,ITBP- 3189, AR- 1490, SSF- 296 ) നിലവിലുള്ളതിനേക്കാൾ ഒഴിവുകൾ വർദ്ധിച്ചേക്കാമെന്നും വിജ്ഞാപനത്തിൽ പറയുന്നു.
21,700-69,100 രൂപ വരെ ശമ്പളം.
18-നും 23-നും ഇടയിൽ ജനിച്ചവർക്കാണ് അപേക്ഷിക്കാനാകുക. ഇതിൽ സംവരണ വിഭാഗത്തിന് ഇളവുണ്ട്.
അപേക്ഷാ ഫീസ് 100 രൂപയാണ്. വനിതകൾ, എസ് സി, എസ്ടി, വിമുക്തഭടർ എന്നിവർക്ക് ഫീസില്ല. ജനുവരി ഒന്ന് വരെ ഫീസടയ്ക്കാം. ജനുവരി നാല് മുതൽ ആറ് വരെയാണ് അപേക്ഷയിലെ തെറ്റ് തിരുത്തുന്നതിനുള്ള അവസരം.
