പച്ചക്കറികളും പഴങ്ങളും ഭക്ഷണത്തിൽ ഉൾപ്പെടുത്തേണ്ടതിന്റെ ആവശ്യകതയെ കുറിച്ച് അറിയാത്തവരായി ആരുമുണ്ടാവില്ല. എന്നാൽ ശുദ്ധമായി പച്ചക്കറികളും പഴങ്ങളും കഴിക്കണമെന്ന് വിചാരിച്ചാലും അതിന് കഴിയാത്തവരാണ് മിക്കവരും. എന്നാൽ കുറച്ച് സ്ഥലത്ത് മികച്ച വിളവും പെട്ടെന്ന് കായ് ഫലവും നൽകുന്ന പച്ചക്കറികളുണ്ട്. വലിയ ഒരുക്കങ്ങളോ മറ്റോ ഇല്ലാതെ തന്നെ നമുക്ക് ഇവ വളർത്തിയെടുക്കാവുന്നതാണ്. പെട്ടെന്ന് വളരുന്ന ചില പച്ചക്കറികൾ ഇതാ..
1) കാരറ്റ്
മാർക്കറ്റിൽ നിന്ന് വാങ്ങുന്ന കാരറ്റാണ് നടുന്നതെങ്കിൽ പെട്ടെന്ന് കായ്ഫലം ലഭിക്കില്ല. എന്നാൽ ചെറുതും നീളം കൂടിയതുമായ കാരറ്റ് നട്ടാൽ പെട്ടെന്ന് ഫലം കിട്ടുന്നതാണ്. ബേബി കാരറ്റ് വീട്ടിൽ കൃഷി ചെയ്ത് 50 ദിവസത്തിനുള്ളിൽ വിളവെടുക്കാവുന്നതാണ്. പ്രത്യേക പരിചരണവും ആവശ്യമില്ലെന്നതാണ് പ്രത്യേകത. 2-3 ദിവസത്തിലൊരിക്കൽ നനയ്ക്കാവുന്നതാണ്.
2) റാഡിഷ്/ മുള്ളങ്കി
വളരെ പെട്ടെന്ന്, ചിലപ്പോൾ ഒരു മാസം കൊണ്ട് വിളവ് ലഭിക്കുന്ന പച്ചക്കറിയാണ് റാഡിഷ്. വിത്ത് പാകിയ നിലത്തോ ചട്ടിയിലോ മണ്ണിലോ വിതയ്ക്കാം. കനം കുറഞ്ഞ വിത്തുകളാകണം വിതയ്ക്കാൻ. ഇടയിൽ 2.5 സെന്റീമീറ്റോളം അകലമുണ്ടെന്ന് ഉറപ്പിക്കണം.
3) കുക്കുമ്പർ
പലരും പച്ചയ്ക്ക് കഴിക്കുന്നൊന്നാണ് കുക്കുമ്പർ. ആരോഗ്യത്തിനും ചർമ സംരക്ഷണത്തിനും ഏറെ ഗദുണങ്ങൾ നൽകുന്ന ഈ പച്ചക്കറി പലരും പുറത്തുനിന്ന് വാങ്ങാറാണ് പതിവ്. എന്നാൽ ഇതും വീട്ടിൽ പെട്ടെന്ന് വളർത്തി, പെട്ടെന്ന് തന്നെ വിളവെടുക്കാവുന്നതാണ്. മൂന്ന് മുതൽ നാല് ആഴ്ചയ്ക്കുള്ളിൽ ഇത് വിളവടുക്കാവുന്നതാണ്.
4) ചീര
ശരീരത്തിന് ഒഴിച്ചുകൂടാനാകാത്ത ഒന്നാണ് ഇലക്കറികൾ. ഇലകറികളിൽ പ്രധാനിയാണ് ചീര. കേവലം 4-5 ആഴ്ചയ്ക്കുള്ളിൽ വളർത്തിയെടുക്കാവുന്ന പച്ചക്കറിയാണ് ചീര. ചതുപ്പിൽ നട്ടാൽ പെട്ടെന്ന് വളരും. അല്ലെങ്കിൽ നന്നായി ചീരയ്ക്ക് വെള്ളം നൽകുന്നുണ്ടെന്ന് വരുത്തുക.
5) ബീൻസ്
രണ്ട് മാസത്തിനുള്ളിൽ ബീൻസ് പറിച്ച് കറി വെക്കാവുന്നതാണ്. എല്ലാവർക്കും ഒരുപോലം ഇഷ്ടപ്പെടുന്ന ഈ പച്ചക്കറി ചട്ടിയിൽ പോലും കൃഷി ചെയ്യാവുന്നതാണ്. മട്ടുപ്പാവിൽ പോലും സുഗമമമായി ബീൻസ് വിളയ്ക്കാം. 25-40 സെന്റീമീറ്റർ വ്യത്യാസത്തിലാകണം ഇവ നടേണ്ടത്.
