വൈറ്റ് ബോൾ ക്രിക്കറ്റിൽ നിന്നും ഇടവേള എടുക്കാൻ ഒരുങ്ങുന്ന നായകൻ രോഹിത് ശർമ്മയ്‌ക്ക് മുന്നിൽ പുതിയ നിർദ്ദേശവുമായി ബിസിസിഐ. ഡിസംബർ 10 ന് ആരംഭിക്കാനിരിക്കുന്ന ദക്ഷിണാഫ്രിക്കൻ പര്യടനത്തിലെ ടി20 പരമ്പരയിൽ ഇന്ത്യയെ നയിക്കാനാണ് രോഹിത് ശർമ്മയോട് ബിസിസിഐ ആവശ്യപ്പെട്ടിരിക്കുന്നത്. 2023 ലെ ഏകദിന ലോകകപ്പിനിടെ കണങ്കാലിന് പരിക്കേറ്റ ഹാർദിക് പാണ്ഡ്യ ടൂർണമെന്റിൽ നിന്ന് വിട്ടുനിൽക്കുന്ന സാഹചര്യത്തിലാണിത്.
ടീമിനൊപ്പം ഹാർദിക് പാണ്ഡ്യ ചേരുമോ എന്ന സംശയം നിലനിൽക്കുന്നത് കൊണ്ടാണ് രോഹിത്തിന് മുന്നിൽ നിർദ്ദേശവുമായി ബിസിസിഐ എത്തിയത്. ഇത് താരം നിരസിച്ചാൽ ഓസ്‌ട്രേലിയ്‌ക്കെതിരായി നടക്കുന്ന ടി20 പരമ്പരയിൽ ഇന്ത്യയുടെ നായകസ്ഥാനം വഹിക്കുന്ന സൂര്യകുമാർ യാദവിന് ദക്ഷിണാഫ്രിക്കൻ പര്യടനത്തിലും ടി20 ടീമിനെ നയിക്കാനുള്ള നറുക്ക് വീഴും. മൂന്ന് ടി20, മൂന്ന് ഏകദിനം, രണ്ട് ടെസ്റ്റ് എന്നിങ്ങനെ ഏട്ട് മത്സരങ്ങളുള്ള പരമ്പര ഡിസംബർ 10നാണ് ആരംഭിക്കുക.
വൈറ്റ് ബോൾ ക്രിക്കറ്റിൽ നിന്ന് ഇടവേള ആവശ്യപ്പെട്ട് വിരാട് കോലി ബിസിസിഐയ്‌ക്ക് കത്തുനൽകിയതായി നേരത്തെ റിപ്പോർട്ടുകളുണ്ടായിരുന്നു. ഇന്ത്യയുടെ സ്റ്റാർ ബാറ്റർമാരായ രോഹിത്ത് ശർമ്മയും വിരാട് കോലിയും നേരത്തെ തന്നെ ടി20യിൽ നിന്ന് അകന്ന് നിൽക്കുകയാണ്. ഇരുവരും 2022ൽ നടന്ന ടി20 ലോകകപ്പിലാണ് അവസാനമായി ഇന്ത്യക്ക് വേണ്ടി ടി20യിൽ ഡണിഞ്ഞത്.
