മുംബൈ: കേന്ദ്ര സർക്കാരിന്റെ നേട്ടങ്ങളും ജനക്ഷേമ പദ്ധതികളും ജനങ്ങളിൽ എത്തിക്കുന്ന പരിപാടിയായ വികസിത സങ്കൽപ്പ യാത്ര വസായ് വിരാർ മേഖലയിൽ ആരംഭിച്ചു. നവംബർ 28 മുതൽ ഡിസംബർ 22 വരെ വസായ് വിരാർ മേഖലയുടെ വിവിധ ഭാഗങ്ങളിൽ പരിപാടി നടക്കും.
വസായിലെ വികസിത സങ്കൽപ്പ യാത്രയുടെ ഉദ്ഘാടനം 29 ന് വിവിസിഎംസി അസിസ്റ്റന്റ് കമ്മീഷണർ നീലേഷ് മാഹ്ത്രെ, ബിജെപി ജില്ലാ ഉപാദ്ധ്യക്ഷൻ കെ.ബി. ഉത്തംകുമാർ, വിവിസിഎംസി മുൻ മേയർ നാരായൺ മാൻകർ, ബിജെപി വസായ് നിയോജകമണ്ഡലം തെരഞ്ഞെടുപ്പ് കൺവീനർ മനോജ് പാട്ടീൽ , ബിജെപി വസായ് റോഡ് മണ്ഡലം അദ്ധ്യക്ഷൻ മഹേഷ് സർവൻകർ എന്നിവർ ചേർന്ന് ഭദ്രദീപം കൊളുത്തി നിർവ്വഹിച്ചു.
ഉജ്ജ്വൽ ഗ്യാസ് യോജന, പ്രധാനമന്ത്രി ആയുഷ്മാൻ ഭാരത് യോജന, പ്രധാനമന്ത്രി കൗശൽ വികാസ് യോജന തുടങ്ങി എല്ലാ കേന്ദ്ര പദ്ധതികളുടെയും ആധാറിന്റെയും സേവനങ്ങൾ ഈ പരിപാടിയിൽ പൊതുജനങ്ങൾക്ക് ലഭ്യമാകും. ഭാരതത്തിൽ എല്ലാഭാഗത്തും വികസിത സങ്കൽപ്പ യാത്ര പരിപാടി നടന്നുവരികയാണ്.
