ലക്നൗ : ഫിറോസാബാദിന് ഇനി പുതിയ പേര് . ചന്ദ്രനഗർ എന്ന പുതിയ പേര് അംഗീകരിച്ച് മുനിസിപ്പൽ കോർപ്പറേഷൻ പ്രമേയം പാസാക്കി. അലിഗഢിന്റെ പേര് ഹരിഗഢ് എന്നാക്കി മാറ്റണമെന്ന നിർദേശവും നേരത്തെ പാസാക്കിയിരുന്നു.
വിവാഹ നഗരിക്കും വളകൾക്കും പേരുകേട്ട ഫിറോസാബാദിന്റെ പേര് ചന്ദ്രനഗർ എന്ന് പുനർനാമകരണം ചെയ്യാനുള്ള നിർദ്ദേശം വ്യാഴാഴ്ച നടന്ന മുനിസിപ്പൽ കോർപ്പറേഷൻ എക്സിക്യൂട്ടീവ് യോഗത്തിലാണ് പാസാക്കിയത്. 2 വർഷം മുമ്പ് ജില്ലാ പഞ്ചായത്ത് യോഗത്തിലും ഈ നിർദേശം പാസാക്കിയിരുന്നു.
മുനിസിപ്പൽ കോർപ്പറേഷൻ യോഗത്തിൽ 12 എക്സിക്യൂട്ടീവ് അംഗങ്ങളിൽ 11 പേരും ഈ നിർദേശത്തെ പിന്തുണച്ചു.നേരത്തെ ഫിറോസാബാദിന്റെ പേര് ചന്ദ്രനഗർ എന്നായിരുന്നുവെന്ന് എക്സിക്യൂട്ടീവ് അംഗങ്ങൾ പറയുന്നു. അതിനാൽ, പേര് മാറ്റിയിട്ടില്ല, പകരം പൗരാണിക പേരിന് ബഹുമാനം നൽകി , അത് വീണ്ടും അംഗീകരിച്ചു – അവർ പറഞ്ഞു.
ഫിറോസാബാദിന്റെ പേര് ചന്ദ്രനഗർ എന്ന് പുനർനാമകരണം ചെയ്യണമെന്ന നിർദ്ദേശം ബോർഡിന് മുന്നിലുണ്ടായിരുന്നു. അങ്ങനെയാണ് ഇപ്പോൾ അംഗീകാരം ലഭിച്ചത്. നിർദ്ദേശം അന്തിമ അനുമതിക്കായി യുപി സർക്കാരിന് അയയ്‌ക്കും.
