അരി ഇല്ലാതെ മലയാളിക്ക് ഒരു ദിനമോ? ചിന്തിക്കാൻ പോലും കഴിയില്ലാ അല്ലേ. അത്രമാത്രം ആത്മബന്ധമാണ് മലയാളിയും അരിയുമായി ഉള്ളത്. പ്രഭാത ഭക്ഷണം മുതൽ അത്താഴം വരെ അരി ആഹാരം ശീലമാക്കിയവരും നമ്മുടെ ഇടയിലുണ്ട്. അരി പോലെ തന്നെ പ്രധാമാണ് അരിപ്പൊടിയും.
എന്നാൽ അരികളിൽ താരം ബസ്മതി അരിയാണ്. ഏഷ്യയിലുടനീളം ബസ്മതി ഹിറ്റാണ്. ബിരിയാണിക്കും പുലാവിനുമൊക്കെ ബസ്മതി കൂടിയേ തീരൂ. ബസ്മതിയുടെ നീളവും ഗന്ധവുമാണ് ഇത്രമേൽ ജനപ്രിയമാക്കുന്നത്.
സുഗന്ധ നെല്ലിനമാണ് ബസ്മതി. സാധാരണ അരിയിൽ നിന്നും വ്യത്യസ്തമായി നീളം കൂടിയ അരിയാണ് ഇവ. ഇന്ത്യയിലാണ് ലോകത്തിലെ ബസ്മതി ഉത്പാദനത്തിന്റെ 70 ശതമാനവും നടക്കുന്നത്. വിവിധയിനം ബസുമതി അരികൾ ഉണ്ട്. ബസുമതി 370, ബസുമതി 385, ഡെറാഡൂണി ബസുമതി, തരാവോരി ബസുമതി തുടങ്ങിയവയാണ് പരമ്പരാഗത ഇന്ത്യൻ ഇനങ്ങൾ. അന്താരാഷ്ട്ര തലത്തിൽ പോലും ഇത്ര പ്രിയമേറിയ ബസ്മതി അരി ഭക്ഷണത്തിൽ ഉൾപ്പെടുത്തുന്നത് ആരോഗ്യത്തിന് ഏറെ ഗുണങ്ങൾ നൽകും. എന്നാൽ പലരും ഇതൊന്നും അറിയാതെയാണ് ബസ്മതി അരിയും ബിരായാണിയുമൊക്കെ കഴിക്കുന്നത്. എന്നാൽ ഇനി ആരോഗ്യഗുണങ്ങൾ അറിഞ്ഞ് ബസ്മതി അരി ഭക്ഷണത്തിൽ ഉൾപ്പെടുത്താം.
ബസ്മതി അരിയുടെ ഗുണങ്ങൾ
1) പ്രമേഹം നിയന്ത്രിക്കാൻ
നല്ല ആവി പറക്കുന്ന കുത്തരി ചോറ് സ്വപ്നം കാണുന്നവരാകും ഓരോ പ്രമേഹ രോഗിയും. ചോറ് കഴിക്കരുതെന്ന ഡോക്ടറുടെ കർശന നിർദ്ദേശം ലഭിച്ചിട്ട് ഇരിക്കുന്നവർ സങ്കടപ്പെടണ്ടേ, ബസ്മതി അരിയിലുണ്ട് പരിഹാരം. ബസ്മതി അരിയിൽ ഗ്ലൈസെമിക് സൂചിക വളരെ കുറവാണ്. എന്തെങ്കിലും കഴിക്കുമ്പോൾ രക്തത്തിലെ പഞ്ചസാരയുടെ അളവ് എത്രത്തോളം ഉയരുമെന്നതിന്റെ സൂചകമാണ് ഗ്ലൈസെമിക് സൂചിക. അതിനാൽ ബസ്മതി അരിയുടെ ചോറ് കഴിക്കുന്നത് കൊണ്ട് രക്തത്തിലെ പഞ്ചസാരയുടെ അളവ് വർദ്ധിക്കില്ല. എന്നാൽ ഡോക്ടറുടെ നിർദ്ദേശ പ്രകാരം മാത്രം കഴിക്കാൻ ശ്രദ്ധിക്കണം.
2) ഹൃദയാരോഗ്യത്തിന്
ഹൃദ്രോഗ സാധ്യത കുറയ്ക്കാൻ ബസ്മതി അരി സഹായിക്കുമെന്നാണ് വിദഗ്ധർ പറയുന്നത്. ബസ്മതി അരിയിൽ ഉയർന്ന അളവിൽ നാരുകൾ അടങ്ങിയിട്ടുണ്ട്. ബ്രൗൺ അരി രക്തത്തിലെ കൊളസ്ട്രോളിന്റെ അളവിനെ നിയന്ത്രിക്കാൻ സഹായിക്കുന്നു. അതുവഴി ഹൃദയാരോഗ്യം മെച്ചപ്പെടുത്തുന്നു.
3) ശരീരഭാരം കുറയ്ക്കാൻ
കലോറി കുറഞ്ഞ അരിയാണ് ഇത്. ബസ്മതി അരി കഴിക്കുന്നത് വഴി വിശപ്പ് അനുഭവപ്പെടുന്നത് തടയുന്നു. അതുകൊണ്ട് തന്നെ ശരീരഭാരം കുറയ്ക്കാൻ ആഗ്രഹിക്കുന്നവർക്കുള്ള മികച്ച ഓപ്ഷനാണ് ബസ്മതി അരി. ദഹന പ്രക്രിയ സുഗമാക്കുന്നതിനും ഇത് സഹായിക്കുന്നു. മലബന്ധം അകറ്റാനും ബസ്മതി അരി സഹായിക്കും.
4) തലച്ചോറിന്റെ ആരോഗ്യത്തിന്
ആന്റിഓക്സിഡന്റുകളുടെയും വിറ്റാമിൻ ബിയുടെയും ഉറവിടമാണ് ബസ്മതി അരി. വിറ്റാമിൻ ബി1-ൽ കാണപ്പെടുന്ന തയാമിൻ സംയുക്തം തലച്ചോറിന്റെ ആരോഗ്യം വർദ്ധിപ്പിക്കുന്നതിന് വളരെ പ്രധാനമാണ്. ശരീരത്തിന് ആവശ്യമായ 22 ശതമാനം വിറ്റാമിൻ ബി1 ഇതിൽ അടങ്ങിയിരിക്കുന്നു. ഇതിന്റെ കുറവ് വെർണിക്കെ എൻസെഫലോപ്പതി എന്ന അവസ്ഥയിലേക്ക് നയിച്ചേക്കാം.
5) രക്തസമ്മർദ്ദം നിയന്ത്രിക്കുന്നു
ബസ്മതി അരിയിൽ അടങ്ങിയിരിക്കുന്ന മഗ്നീഷ്യം, പൊട്ടാസ്യം എന്നിവ ഉയർന്ന രക്തസമ്മർദ്ദം കുറയ്ക്കാൻ സഹായിക്കുന്നു. ഈ പോഷകങ്ങൾ രക്തയോട്ടം വർദ്ധിപ്പിക്കാൻ സഹായിക്കുന്നു, ശരീരത്തിലെ മൊത്തത്തിലുള്ള രക്തചംക്രമണം മെച്ചപ്പെടുത്തുന്നു. ഒരു കപ്പ് ബസുമതി അരിയിൽ ഏകദേശം 200 കലോറി അടങ്ങിയിട്ടുണ്ട്. മിതമായ അളവിലാണ് ബസ്മതി അരി കഴിക്കുന്നത് എന്ന് ഉറപ്പ് വരുത്തേണ്ടതാണ്. ഇല്ലെങ്കിൽ ആരോഗ്യത്തിന് ഗുണം പോലെ തന്നെ ദോഷവും വരുത്തിയേക്കാം.