ചടയമംഗലം: ദിവ്യാംഗനായ ആളുടെ കട കാറുകൊണ്ട് ഇടിച്ചു തകർത്ത് പരിക്കേൽപ്പിച്ച യുവാവ് അറസ്റ്റിൽ. ആയൂർ സ്വദേശി സദ്ദാം ആണ് അറസ്റ്റിലായത്. ഗുരുതരമായി പരിക്കേറ്റ കടയുടമ മോഹനനെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
കഴിഞ്ഞ ദിവസം രാത്രി എംസി റോഡിൽ ആയൂരിലാണ് സംഭവം. കാറിലെത്തിയ സദ്ദാം മോഹനനോട് സിഗരറ്റ് കാറിനടുത്ത് കൊണ്ട് വരാൻ പറഞ്ഞു. എന്നാൽ താൻ ദിവ്യാംഗൻ ആണെന്നും ഇറങ്ങി വരാൻ പറ്റില്ലെന്നും മോഹനൻ പറഞ്ഞു.
ഇതോടെ പ്രകോപിതനായ പ്രതി കാർ പിന്നോട്ട് എടുക്കുകയും തുടർന്ന് 3 തവണ കടയിലേക്ക് ഇടിച്ചു കയറ്റുകയും ചെയ്തു. ഇതോടെ കട തകർന്ന് മോഹനന് ഗുരുതരമായി പരിക്കേറ്റു. സമീപത്തുള്ള കടക്കാരാണ് തകർന്ന കടക്കുള്ളിൽ നിന്നും മോഹനനെ പുറത്തെടുത്തതും ആശുപത്രിയിൽ പ്രവേശിപ്പിച്ചതും.
ചടയമംഗലം എസ്എച്ച്ഒ സുനീഷിന്റെ നേതൃത്വത്തിൽ ആയൂരിൽ നിന്നാണ് പ്രതിയെ പിടികൂടിയത്. കാറും കസ്റ്റഡിയിലെടുത്തു. സദ്ദാമിനെതിരെ വധശ്രമം ഉൾപ്പെടെയുള്ള വകുപ്പുകൾ ചുമത്തിയാണ് കേസെടുത്തിരിക്കുന്നത്.
