ഇലക്ട്രിക് കാറിന് രണ്ട് ബാറ്ററി ഓപ്ഷനുകൾ നൽകാനൊരുങ്ങി മാരുതി സുസുക്കി. ഒറ്റ ചാർജിംഗിൽ 550 കിലോമീറ്റർ ദൂരം സഞ്ചരിക്കാനാകുക എന്ന ലക്ഷ്യത്തോടെയാണ് പുതിയ പതിപ്പിൽ രണ്ട് ബാറ്ററികൾ സജ്ജമാക്കുന്നത്. 2024 അവസാനത്തോടെ മാരുതി സുസുക്കി ഇവിഎക്സ് രാജ്യത്ത് അവതരിപ്പിക്കുമെന്ന് കമ്പനി അറിയിച്ചു.
ഈ വർഷം ആദ്യമാണ് മാരുതി സുസുക്കി ഇന്ത്യ ലിമിറ്റഡ് ഇവിഎക്സ് എന്ന ആശയം പങ്കുവയ്ക്കുന്നത്. നോയിഡയിൽ നടന്ന ഓട്ടോ എക്സ്പോയിൽ അടുത്ത വർഷം തങ്ങളുടെ ബ്രാൻഡിന്റെ ആദ്യ ഇലക്ട്രിക് വാഹനം പുറത്തിറക്കുമെന്ന് കമ്പനി പ്രഖ്യാപിച്ചിരുന്നു. ഇതിന് ശേഷം ടോക്കിയോയിൽ നടന്ന ജപ്പാൻ മൊബിലിറ്റി ഷോയിൽ ഇവിഎക്സുമായി ബന്ധപ്പെട്ട കൂടുതൽ വിവരങ്ങൾ കമ്പനി പ്രഖ്യാപിച്ചു.
ഇതിന് ശേഷം ഇവിഎക്സിന്റെ ട്രയൽ റണ്ണുകൾ രാജ്യത്ത് അരങ്ങേറി. ഇത്തരത്തിൽ നിരവധി ഘട്ടങ്ങളിലൂടെയാണ് പ്രവർത്തന ക്ഷമത വിലയിരുത്തിയിരിക്കുന്നത്. പ്രീമിയം കാറെന്ന നിലയിലാകും ഇത് വിപണിയിലെത്തുക. 15 ലക്ഷം രൂപയായിരിക്കും വിപണി വില എന്നാണ് പുറത്തുവരുന്ന റിപ്പോർട്ടുകൾ.
