കെജിഎഫിന് ശേഷം രാജ്യമെമ്പാടുമുള്ള സിനിമ ആരാധകരുടെ ചർച്ചകൾ സലാറിനെ പറ്റിയാണ്. ഇന്നലെ ലോകമെമ്പാടുമുള്ള തീയേറ്ററുകളിൽ പ്രദർശനത്തിനെത്തിയ ചിത്രം ആവേശത്തോടെയാണ് ആരാധകർ ഏറ്റെടുത്തതും. കളക്ഷൻ റെക്കോർഡുകൾ ഭേദിച്ച് മുന്നേറുന്ന ചിത്രത്തിന് പ്രശംസയുമായി താരങ്ങളടക്കം ഇതിനോടകം എത്തിക്കഴിഞ്ഞു. ചിത്രത്തെ പ്രശംസിച്ച് എത്തിയിരിക്കുകയാണ് കന്നട സംവിധായകനും നടനുമായ ഋഷഭ് ഷെട്ടി. ഇന്ത്യൻ സിനിമയിലെ മികച്ച മാസ് ചിത്രങ്ങളിലൊന്നായി സലാർ ഇടം പിടിച്ചിരിക്കുകയാണെന്ന് റിഷഭ് പറയുന്നു.
#SalaarCeaseFire stands as one of the most incredible mass films!
Kudos to Prabhas Sir for his outstanding performance, and a special shoutout to Prithiviraj sir for nailing the role. Big hug to Prashanth Neel for weaving a beautiful story about friendship, and heartfelt…
— Rishab Shetty (@shetty_rishab) December 22, 2023
‘ഇന്ത്യൻ സിനിമയിലെ മികച്ച മാസ് ചിത്രങ്ങളിലൊന്നാണ് സലാർ! ചിത്രത്തിലെ പ്രഭാസ് സാറിന്റെ മികച്ച പ്രകടനത്തിന് അഭിനന്ദനങ്ങൾ, ഒപ്പം സുപ്രധാന കഥാപാത്രത്തെ അവതരിപ്പിച്ച പൃഥ്വിരാജ് സാറിനും പ്രത്യേക അഭിനന്ദനങ്ങൾ. സൗഹൃദത്തെക്കുറിച്ച് മനോഹരമായ ഒരു കഥ പറഞ്ഞ പ്രശാന്ത് നീലിനെ എത്ര പ്രശംസിച്ചാലും മതിവരില്ല. ഒപ്പം ഹോംബാലെ ഫിലിംസിനും വിജയ്ക്കും എന്റെ ഹൃദയംഗമമായ അഭിനന്ദനങ്ങൾ’. എന്നായിരുന്നു റിഷഭ് ഷെട്ടി സമൂഹമാദ്ധ്യമമായ എക്സിൽ പങ്കുവെച്ച കുറിപ്പ്.
തെലുങ്ക് സൂപ്പർ സ്റ്റാർ ചിരഞ്ജീവിയും സലാറിന് ആശംസകളുമായി എത്തിയിരുന്നു. ചിത്രത്തിലെ നായകന്മാരായ പ്രഭാസ്, പൃഥ്വിരാജ് എന്നിവരുടെ പ്രകടനങ്ങളെ അദ്ദേഹം അഭിനന്ദിച്ചു.
ബോക്സോഫീസിൽ അതിഗംഭീര തുടക്കമാണ് സലാർ നേടിയിരിക്കുന്നത്. ആഗോളതലത്തിൽ ചിത്രത്തിന് 175 കോടി രൂപ കളക്ഷനാണ് ആദ്യദിനം ലഭിച്ചിരിക്കുന്നതെന്നാണ് റിപ്പോർട്ടുകൾ. ഇന്ത്യയിൽ മാത്രം ചിത്രം 95 കോടി രൂപയോളം നേടി. 1000 കോടി ക്ലബ്ബിൽ കയറിയ ഷാരൂഖ് ഖാൻ ചിത്രങ്ങളായ പഠാനെയും ജവാനെയും മറികടന്നാണ് സലാർ ബോക്സോഫീസിൽ റെക്കോർഡ് സൃഷ്ടിച്ചിരിക്കുന്നത്. പഠാൻ ആദ്യ ദിനം നേടിയത് 57 കോടി രൂപയും ജവാൻ 129 കോടി രൂപയുമായിരുന്നു.
ചിത്രത്തിൽ മാസ് ലുക്കിൽ ദേവ എന്ന കഥാപാത്രവുമായി പ്രഭാസ് എത്തിയപ്പോൾ ഇമോഷണൽ രംഗങ്ങളുമായി വർദ്ധരാജ് മാന്നാർ എന്ന കഥാപാത്രത്തെയാണ് പൃഥ്വിരാജ് അവതരിപ്പിച്ചിരിക്കുന്നത്. വൻ ക്യാൻവാസിലാണ് പ്രശാന്ത് നീൽ സലാർ ഒരുക്കിയിരിക്കുന്നത്. ഇടവേളയ്ക്ക് ശേഷം സലാറിലൂടെ വൻ തിരിച്ചു വരവ് നടത്തിയിരിക്കുകയാണ് നടി ശ്രുതി ഹാസനും.