മുംബൈ: താനെ ഘോഡ്ബന്ദറിൽ നടന്ന റേവ് പാർട്ടിയിൽ പങ്കെടുത്ത 95 യുവാക്കളെ കസ്റ്റഡിയിലെടുത്തു. പരിശോധനയിൽ വൻതോതിൽ മയക്കുമരുന്ന് പിടികൂടി. താനെ, ഭിവണ്ടി, മീരാ റോഡ്, പാൽഘർ, കല്യാൺ, ഡോംബിവ്ലി, നവി മുംബൈ എന്നിവിടങ്ങളിൽ നിന്നുള്ള യുവാക്കളാണ് പിടിയിലായത്.
പാർട്ടിയിലേയ്‌ക്ക് യുവാക്കളെ ക്ഷണിച്ചുകൊണ്ടുള്ള പോസ്റ്റർ സംഘാടകർ നേരത്തെ സോഷ്യൽ മീഡിയയിൽ പങ്കുവച്ചിരുന്നു. പാർട്ടി ആരംഭിച്ച് ആദ്യത്തെ രണ്ട് മണിക്കൂറിനുള്ളിൽ നൂറുകണക്കിന് പേർ പാർട്ടിയിൽ പങ്കെടുത്തതായാണ് വിവരം. രഹസ്യ വിവരത്തെ തുടന്ന് നടത്തിയ പോലീസ് പരിശോധനയിലാണ് കാസർവാഡാവലി പോലീസ് യുവാക്കളെ പിടികൂടിയത്. ഇന്നലെ അർദ്ധ രാത്രിയോടെയായിരുന്നു റെയ്ഡ് ആരംഭിച്ചത്.
എൽഎസ്ഡി, ചരസ്, എക്സ്റ്റസി ഗുളികകൾ, കഞ്ചാവ് തുടങ്ങിയ ലഹരി വസ്തുക്കൾ റെഡിയിൽ പിടികൂടി. പാർട്ടിയുടെ സംഘാടകരായ അഞ്ച് സ്ത്രീകളും രണ്ട് യുവാക്കളെയും പോലീസ് അറസ്റ്റ് ചെയ്തു. പോലീസ് കമ്മീഷണർ അശുതോഷ് ഡംബ്രെയുടെ നേതൃത്വത്തിലുള്ള ക്രൈംബ്രാഞ്ച് ഉദ്യോഗസ്ഥരാണ് പ്രതികളെ പിടികൂടിയത്.
