ന്യൂഡൽഹി: ജനുവരി 22-ന് നടക്കുന്ന അയോദ്ധ്യാ രാമക്ഷേത്രത്തിന്റെ പ്രാണപ്രതിഷ്ഠാ ചടങ്ങ് ന്യൂയോർക്കിൽ തത്സമയ സംപ്രേക്ഷണം ചെയ്യും. ന്യൂയോർക്ക് ടൈംസ് സ്ക്വയറിലാണ് തത്സമയം സംപ്രേക്ഷണം ചെയ്യുന്നത്.
കോടിക്കണക്കിന് വിശ്വാസികളുടെ കാത്തിരിപ്പായ രാംലല്ലയുടെ പ്രാണപ്രതിഷ്ഠാ ചടങ്ങ് രാജ്യത്തുടനീളം തത്സമയം സംപ്രേക്ഷണം ചെയ്യുമെന്ന് ബിജെപി നേരത്തെ അറിയിച്ചിരുന്നു. രാജ്യത്തുടനീളം ബൂത്ത് തലത്തിലാണ് സംപ്രേക്ഷണം ചെയ്യുന്നത്. ഇതിനായി വലിയ സ്ക്രീനുകൾ സജ്ജീകരിക്കാൻ ബിജെപി പ്രവർത്തകർക്ക് നിർദ്ദേശം നൽകിയിട്ടുണ്ട്.
രാംലല്ലയുടെ പ്രാണപ്രതിഷ്ഠ ചടങ്ങ് തത്സമയം കാണാൻ സാധാരണ ജനങ്ങൾക്കും അവസരമൊരുക്കി കൊടുക്കുക എന്നതാണ് ബിജെപി ലക്ഷ്യമിടുന്നത്. പ്രാണപ്രതിഷ്ഠാ ചടങ്ങ് രാജ്യതലസ്ഥാനത്തെ 14,000 ക്ഷേത്രങ്ങളിലും തത്സമയം സംപ്രേക്ഷണം ചെയ്യും. നഗരത്തിലെ ക്ഷേത്രങ്ങളിലുടനീളം വലിയ സ്ക്രീനുകൾ സ്ഥാപിക്കുമെന്നും 30 ലക്ഷത്തോളം ആളുകൾ പ്രാണപ്രതിഷ്ഠാ ചടങ്ങിന് സാക്ഷ്യം വഹിക്കാൻ ക്ഷേത്രങ്ങളിൽ സന്നിഹിതരായിരിക്കുമെന്ന് ബിജെപി അറിയിച്ചു.