ദിവസവും തൈര് കഴിക്കുന്നത് ആരോഗ്യത്തിന് നല്ലതാണെന്നാണ് വിദഗ്ധർ പറയുന്നത്. പ്രോബയോട്ടിക്സ് വിഭാഗത്തിൽ പെടുന്ന വിഭവമായ തൈര് ദഹനം മെച്ചപ്പെടുത്താനും രോഗങ്ങളെ ചെറുക്കാനും സഹായിക്കുന്നു. ചർമ്മത്തിന് തിളക്കം നിലനിർത്തുന്നതിനും മൃദുത്വം നൽകുന്നതിനും തൈരിനുള്ള പങ്ക് വളരെ വലുതാണ്. എല്ലുകളുടെ ആരോഗ്യത്തിനും മെച്ചപ്പെട്ട ഉറക്കത്തിനും ഇത് സഹായിക്കുന്നു.
എന്നാൽ മറ്റ് ചില ഭക്ഷണങ്ങൾക്കൊപ്പമാകും മിക്കപ്പോഴും നമ്മൾ തൈര് കഴിക്കുക. മിക്ക ഭക്ഷണങ്ങൾക്കുമൊപ്പം ഇത് കഴിക്കാവുന്നതാണെങ്കിലും ചില ഭക്ഷണങ്ങൾക്കൊപ്പം തൈര് കഴിക്കാൻ പാടില്ല. അവയിൽ ചിലത് ഇതാ..
1) സിട്രസ് പഴങ്ങൾ
ഓറഞ്ച്, മുന്തിരി, നാരങ്ങ തുടങ്ങിയ സിട്രസ് പഴങ്ങളിൽ അസിഡിറ്റി കൂടുതലാണ്. അസിഡിറ്റി ഉള്ള തൈരുമായി ഇത് ചേർന്ന് വഴി ആമാശയത്തിലെ പിഎച്ച് അളവിൽ മാറ്റങ്ങൾ സംഭവിക്കാം. ഇത് ദഹനക്കേട്, നെഞ്ചെരിച്ചിൽ, വയറുവേദന എന്നിവയ്ക്ക് കാരണമാകാം. വാഴപ്പഴം അല്ലെങ്കിൽ അസിഡിറ്റി കുറഞ്ഞ പഴങ്ങൾ തൈരിനൊപ്പം കഴിക്കുന്നതിൽ തെറ്റില്ലെന്നും വിദഗ്ധർ പറയുന്നു.
2) തക്കാളി
അസിഡിറ്റി നിറഞ്ഞതാണ് തക്കാളിയും. തൈരിനൊപ്പം കഴിക്കുന്നത് ദഹനത്തെ ബാധിക്കും. തക്കാളിയിൽ അടങ്ങിയിരിക്കുന്ന ടാനിൻ, തൈരിൽ അടങ്ങിയിരിക്കുന്ന ചില പോഷകങ്ങൾ ആഗിരണം ചെയ്യുന്നതിന് തടസം സൃഷ്ടിക്കുന്നു. നേരിട്ട് ഇവ രണ്ടും കഴിക്കുന്നത് ഒഴിവാക്കുക.
3) ഇലക്കറികൾ
പോഷക സമ്പന്നമാണ് ഇലക്കറികൾ. എന്നാൽ തൈരുമായി ചേർത്ത് കഴിക്കുന്നത് കാൽസ്യം ആഗിരണം ചെയ്യുന്നതിനെ തടസ്സപ്പെടുത്തുന്നു. ചില ഇലകളിൽ അടങ്ങിയിരിക്കുന്ന ഓക്സലേറ്റുകൾ കാൽസ്യവുമായി ചേരുന്നതിനാലാണ് കാൽസ്യം ആഗിരണത്തെ തടയുന്നത്.
4) എരിവുള്ള ഭക്ഷണങ്ങൾ
പല വിഭവങ്ങൾക്കും രുചിയും മണവും വർദ്ധിപ്പിക്കാൻ സുഗന്ധവ്യഞ്ജനങ്ങൾക്ക് കഴിയുമെങ്കിലും ഇവ തൈരിനൊപ്പം കഴിക്കുന്നത് അത്ര നന്നല്ല. തൈരിനൊപ്പം ചേർക്കുന്നത് അസിഡിറ്റിക്കും ദഹനക്കേടിനും ഇടയാക്കും. എരിവുള്ള ഭക്ഷണങ്ങൾ കഴിക്കുമ്പോൾ ശരീരം ചൂടാകുന്നു, അതുവഴി വയറ്റിലെ ആവരണത്തെ പ്രകോപിപ്പിക്കുന്നു. ഈ സമയം തന്നെ തൈര് കഴിച്ചാൽ ചൂടിനെ പ്രതിരോധിക്കാൻ കഴിയാതെ വരുന്നു. പകരം ശരീരത്തിന് ദോഷങ്ങളും സൃഷ്ടിക്കുന്നു.