ലണ്ടൻ: അയോദ്ധ്യാ രാമക്ഷേത്രത്തിലെ പ്രാണപ്രതിഷ്ഠയ്ക്ക് മുന്നോടിയായി ബ്രിട്ടണിൽ ആഘോഷവുമായി ഇന്ത്യൻ സമൂഹം. ലണ്ടനിലെ ഇന്ത്യൻ സമൂഹമാണ് പ്രാണപ്രതിഷ്ഠാ ചടങ്ങിന് മുന്നോടിയായി ഒത്തുകൂടിയത്. വിശ്വാസികൾ ഒരുമിച്ച് ചേർന്ന് കാർ റാലിയും സംഘടിപ്പിച്ചു. 325-ലധികം കാറുകളിലായി 1000-ലധികം പേരാണ് ആഘോഷ റാലിയിൽ പങ്കെടുത്തത്. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായിരിക്കുകയാണ്. ജയ് ശ്രീ റാം വിളികളും ശ്രീരാമ സ്തുതികളും കാവി പതാകകളുമേന്തിയാണ് വിശ്വാസികൾ റാലിയിൽ അണി ചേർന്നത്.
വെസ്റ്റ് ലണ്ടനിലെ കോളിയർ റോഡിലെ സിറ്റി പവലിയനിൽ നിന്ന് ആരംഭിച്ച റാലി ഈസ്റ്റ് ലണ്ടനിലൂടെ സഞ്ചരിച്ച് സിറ്റി പവലിയനിൽ തന്നെ അവസാനിച്ചു. 500 വർഷത്തെ കാത്തിരിപ്പിനൊടുവിലാണ് അയോദ്ധ്യയിൽ രാമക്ഷേത്രം ഉയരുന്നത്. വത്തിക്കാൻ നഗരം ക്രിസ്ത്യാനികൾക്ക് പ്രിയപ്പെട്ട ഇടമാണ്. സിഖുകാർക്ക് സുവർണ്ണ ക്ഷേത്രവും പ്രിയപ്പെട്ടതാണ്. അതുകൊണ്ട് തന്നെ രാമക്ഷേത്രം എന്നും ഹിന്ദുകൾക്ക് വൈകാരികമായ പുണ്യ സ്ഥലമാണ്. – ആഘോഷത്തിൽ പങ്കുചേർന്ന രവി ബണോട്ട് പറഞ്ഞു.
നേരത്തെ പ്രാണ പ്രതിഷ്ഠാ ചടങ്ങിന് മുന്നോടിയായി ഓസ്ട്രേലിയയിലെ ഇന്ത്യൻ സമൂഹവും ആഘോഷങ്ങൾ സംഘടിപ്പിച്ചിരുന്നു. സിഡ്നിയിലുള്ള വിശ്വാസികളാണ് വാഹനങ്ങൾ അണിനിരത്തി റാലി സംഘടിപ്പിച്ചത്.
