പ്രവൃത്തികൊണ്ടും വാക്കുകൾ കൊണ്ടും വാർത്തകളിൽ ഇടംപിടിക്കുന്ന പാക് ഗായകൻ റാഹത്ത് ഫത്തേഹ് അലിഖാന്റെ പരാമർശം വീണ്ടും വിവാദത്തിൽ. ഇന്ത്യക്കാർ വിവാഹം വിദേശത്ത് നടത്തുന്നത് പാകിസ്താൻ ഗായകരെ ക്ഷണിക്കാൻ വേണ്ടിയെന്നാണ് താരത്തിന്റെ കണ്ടെത്തൽ. ഒരു യുട്യൂബറുമായി നടത്തിയ അഭിമുഖത്തിലാണ് താരത്തിന്റെ പരാമർശം. എന്നെ പോലുള്ള ആർട്ടിസ്റ്റുകളെ ഇന്ത്യക്കാർക്ക് വേണം. പാകിസ്താൻ ഗായകരെ ഇന്ത്യയിൽ നിന്ന് വിലക്കിയതു മുതൽ അവർ വിവാഹങ്ങൾ വിദേശങ്ങളിൽ വച്ച് നടത്താൻ തുടങ്ങി.
എന്നെപോലുള്ള ഗായകരായ ഷഫഖത്ത് അമാനത്ത് അലി, ആതിഫ് അസ്ലം തുടങ്ങിയവർക്ക് ഇന്ത്യയിൽ വന്ന് പരിപാടി അവതരിപ്പിക്കാൻ ആകില്ലല്ലോ.ഞങ്ങൾക്ക് വേണ്ടിയാണ് അവർ വിവാഹങ്ങൾ വിദേശത്ത് നടത്തുന്നത്.- ഗായകൻ പറഞ്ഞു.
2016 ഉറി ആക്രമണത്തിന് ശേഷമാണ് പാകിസ്താൻ കലാകാരന്മാരെ ഇന്ത്യ വിലക്കിയത്. അതേസമയം ഒരാഴ്ച മുൻപ് തന്റെ ജോലിക്കാരനെ ചെരുപ്പൂരിയടിച്ച് വിവാദത്തിലായിരുന്നു റാഹത്ത് ഫത്തേഹ് അലിഖാൻ. ഇതിന്റെ വീഡിയോ സോഷ്യൽ മീഡിയയിൽ വൈറലായിരുന്നു. മദ്യപിച്ച് ലക്കുകെട്ട നിലയിലായിരന്ന താരം പിന്നീട് ക്ഷമാപണവുമായി രംഗത്തുവന്നിരുന്നു.
