ചെന്നൈ: തമിഴ്നാട്ടിൽ സർക്കാർ പദ്ധതിപ്രകാരം കുഞ്ഞിന് സ്വർണമോതിരം നൽകിയില്ലെന്നാരോപിച്ച് നഴ്‌സിനും മറ്റ് രണ്ട് പേർക്കും നേരെ ആക്രമണം. കുംഭകോണത്തിന് സമീപം പട്ടേശ്വരം പ്രാഥമികാരോഗ്യ കേന്ദ്രത്തിലെ നഴ്‌സ് അലമേലുവിനും ഒപ്പമുണ്ടായിരുന്ന രണ്ട് പേർക്കുമാണ് ആക്രമണത്തിൽ പരുക്കേറ്റത്. ചട്ടുകം ഉപയോഗിച്ചാണ് ആക്രമണം നടന്നതെന്നാണ് ആശുപത്രി അധികൃതർ പറയുന്നത്.
സമത്വപുരം സ്വദേശി മദനാണ് ആക്രമണം നടത്തിയതെന്ന് ആശുപത്രി അധികൃതർ ആരോപിച്ചു. പരുക്കേറ്റ അലമേലുവിനെയും മറ്റ് രണ്ട് പേരെയും ആശുപത്രിയിൽ പ്രവേശിപ്പിച്ച് ചികിത്സ നൽകി.
മദന്റെ ഭാര്യ വനിത അടുത്തിടെ സർക്കാർ ആശുപത്രിയിൽ രണ്ടാമത്തെ കുഞ്ഞിന് ജന്മം നൽകിയിരുന്നു. തമിഴ്നാട് സർക്കാർ നടപ്പാക്കുന്ന ‘തായ്മാമൻ തങ്കമോതിരം’ പദ്ധതിപ്രകാരം കുഞ്ഞിന് സ്വർണമോതിരത്തിന് അർഹതയുണ്ടായിരുന്നുവെന്നാണ് മദന്റെ വാദം.
എന്നാൽ പദ്ധതിപ്രകാരമുള്ള സ്വർണമോതിരം നൽകുന്നത് നഴ്‌സ് അലമേലു നിഷേധിച്ചുവെന്ന് ആരോപിച്ചാണ് മദൻ ആക്രമണം നടത്തിയതെന്നാണ് ആശുപത്രി അധികൃതർ പറയുന്നത്. ഇതുമായി ബന്ധപ്പെട്ട തർക്കമാണ് പിന്നീട് ആക്രമണത്തിലേക്ക് നയിച്ചതെന്നാണ് റിപ്പോർട്ട്.
പൊലീസ് അന്വേഷണം ആരംഭിച്ചു
സംഭവത്തിൽ പട്ടേശ്വരം പൊലീസ് കേസെടുത്ത് അന്വേഷണം ആരംഭിച്ചു. ആക്രമണത്തിന്റെ സാഹചര്യം, പദ്ധതിപ്രകാരമുള്ള ആനുകൂല്യത്തിന് കുഞ്ഞ് അർഹനായിരുന്നോ, സ്വർണമോതിരം നൽകുന്നതുമായി ബന്ധപ്പെട്ട് എന്തെങ്കിലും ഔദ്യോഗിക നടപടികൾ ബാക്കിയുണ്ടായിരുന്നോ തുടങ്ങിയ കാര്യങ്ങൾ പൊലീസ് പരിശോധിച്ചുവരികയാണ്.
