പെരുമ്പാവൂർ: വെങ്ങോല പഞ്ചായത്തിലെ പാലായിക്കുന്ന് പ്രദേശത്ത് അർധരാത്രിയുണ്ടായ ശക്തമായ ഇടിമിന്നലിൽ പത്തോളം വീടുകൾക്ക് നാശനഷ്ടം. ഞായറാഴ്ച രാത്രി 12 മണിയോടെയാണ് പ്രദേശത്ത് ശക്തമായ ഇടിമിന്നലുണ്ടായത്. നിരവധി വീടുകളിലെ വൈദ്യുതി വയറിങ്ങും ഗൃഹോപകരണങ്ങളും കത്തിനശിച്ചു.
പാലായിക്കുന്ന് അമ്പാട്ട് വീട്ടിൽ സാറാമ്മയുടെ വീടിനാണ് കാര്യമായ നാശനഷ്ടമുണ്ടായത്. ഇടിമിന്നലിന്റെ ആഘാതത്തിൽ വീടിന്റെ ഭിത്തിയിൽ വിള്ളൽ രൂപപ്പെട്ടു. കാർ ഷെഡിനോട് ചേർന്നുള്ള തറ ചിതറി കല്ലും മണ്ണും തെറിച്ചുവീണു.
വീട്ടിലെ വയറിങ്ങും വൈദ്യുതി ഉപകരണങ്ങളും പൂർണമായും കത്തിനശിച്ചു. സംഭവത്തിൽ സാറാമ്മയുടെ പേരക്കുട്ടി അക്ഷരയുടെ കൈകൾക്ക് നേരിയ പൊള്ളലേറ്റു.
ഇടിമിന്നലിന്റെ ആഘാതത്തിൽ തറയിൽനിന്ന് ഇളകിത്തെറിച്ച കല്ലും മണ്ണും സമീപത്തെ വീടിന്റെ മേച്ചിലിന്റെ മുകൾഭാഗം വരെ തെറിച്ചെത്തിയതായും നാട്ടുകാർ പറഞ്ഞു.
നിരവധി വീടുകളിൽ ഉപകരണങ്ങൾ കത്തിനശിച്ചു. ഇവിടങ്ങളിലെ ഫാൻ, എസി, ഫ്രിഡ്ജ്, ഇൻവർട്ടർ തുടങ്ങിയ നിരവധി ഗൃഹോപകരണങ്ങൾ ഇടിമിന്നലിൽ കത്തിനശിച്ചു. വീടുകളുടെ വൈദ്യുതി സംവിധാനങ്ങൾക്കും കേടുപാടുകൾ സംഭവിച്ചു.
