മുംബൈ: ജൂണിൽ അമേരിക്കയിലും വെസ്റ്റിൻഡീസിലുമായി നടക്കുന്ന ടി20 ലോകകപ്പിന് ശേഷം ഇന്ത്യൻ ടീം സിംബാബ്‌വെയിൽ ടി20 പരമ്പര കളിക്കും. ജൂലൈയിൽ നടക്കുന്ന പരമ്പരയിൽ അഞ്ച് മത്സരങ്ങളുണ്ടാകും. ജൂലൈ 6,7,10,13,14 ദിവസങ്ങളിലാണ് മത്സരം. സീനിയർ താരങ്ങൾക്ക് പകരം യുവതാരങ്ങളായിരിക്കും പരമ്പരയിൽ പങ്കെടുക്കുകയെന്നാണ് സൂചന.
ലോകകപ്പിന് മുമ്പ് ഇനി ഇന്ത്യ ടി20 പരമ്പരകളില്ല. അഫ്ഗാനിസ്ഥാനെതിരെയായിരുന്നു അവസാന ടി20 പരമ്പര. ഐപിഎല്ലിന് ശേഷം താരങ്ങൾ ടി20 ലോകകപ്പ് കളിക്കും. സിംബാബ്‌വെയുമായി 2016ലാണ് ഇന്ത്യ ഇതിന് മുമ്പ് ടി20 പരമ്പര കളിച്ചത്. മൂന്ന് മത്സരങ്ങളടങ്ങിയ പരമ്പരയിൽ ഇന്ത്യ വിജയിച്ചിരുന്നു.
ഇതുവരെ പരസ്പരം കളിച്ച എട്ട് ടി20 മത്സരങ്ങളിൽ ആറിലും ഇന്ത്യ ജയിച്ചു. 2022-ൽ നടന്ന ടി20 ലോകകപ്പിലാണ് ഇരു ടീമുകളും അവസാനമായി ഏറ്റുമുട്ടിയത്. അന്ന് ഇന്ത്യ ജയിച്ചിരുന്നു.
