ന്യൂഡൽഹി: മുഖ്യമന്ത്രി അരവിന്ദ് കെജ്രിവാളും പഞ്ചാബ് മുഖ്യമന്ത്രി ഭഗവന്ത് മന്നും ഇന്ന് അയോദ്ധ്യയിൽ എത്തും. രാംലല്ലയെ ദർശിക്കാൻ കെജ്രിവാൾ കുടുംബ സമേതമാണ് എത്തുക. ഭാര്യയും മക്കളും മാതാപിതാക്കളും അദ്ദേഹത്തോടൊപ്പമുണ്ടാകും.
ജനുവരി 22ന് നടന്ന പ്രാണപ്രതിഷ്ഠാ ചടങ്ങിൽ പങ്കെടുക്കാൻ കെജ്രിവാളിന് ക്ഷണം ലഭിച്ചിരുന്നു. എന്നാൽ താൻ പിന്നീട് ദർശനം നടത്തുമെന്നും കുടുംബത്തോടൊപ്പമാണ് വരികയെന്നുമാണ് കെജ്രിവാൾ പറഞ്ഞിരുന്നത്.
രാജ്യത്തിന്റെ വിവിധ കോണുകളിൽ നിന്നും അയോദ്ധ്യയിലേക്ക് വൻ ഭക്തജന പ്രവാഹമാണ്. ജനുവരി 22ന് ശേഷം പ്രതിദിനം ലക്ഷക്കണക്കിന് ഭക്തരാണ് രാംലല്ലയെ ദർശിക്കാനെത്തുന്നത്. കഴിഞ്ഞ ദിവസം ഉത്തർപ്രദേശിലെ എല്ലാ ജനപ്രതിനിധികളും അയോദ്ധ്യയിലെത്തിയിരുന്നു. മുഖ്യമന്ത്രി യോഗി ആദിത്യനാഥിനൊപ്പമാണ് എംഎൽഎമാർ രാംലല്ലയെ ദർശിക്കാൻ എത്തിയത്. സമാജ് വാദി പാർട്ടിയിൽ നിന്നുള്ള പ്രതിനിധികൾ ഒഴികെ പ്രതിപക്ഷ എംഎൽഎമാർ അടക്കമാണ് യോഗിക്കൊപ്പം അയോദ്ധ്യയിലേക്ക് വന്നത്.
