മാറി വരുന്ന ജീവിതശൈലികളിൽ ആടിയുലയുന്ന ഒരു സമൂഹമാണ് ആധുനികലോകത്തിലുള്ളത്. അതിനാൽ തന്നെ ഇത്തരം ജീവിത സാഹചര്യങ്ങൾ കാൻസർ പോലുള്ള മാരക രോഗങ്ങൾ പിടിപ്പെടുന്നതിലേക്ക് നമ്മെ തള്ളിവിടുന്നു. കുഞ്ഞുങ്ങളെന്നോ മുതിർന്നവരെന്നോ വ്യത്യാസങ്ങളില്ലാതെ ഏവരിലും കാൻസർ വരുന്നുണ്ട്. ഇതിന് ഒരു പരിധിവരയെയുള്ള കാരണം ഭക്ഷണരീതി കൂടിയാണ്. കാൻസർ വരാനുള്ള സാധ്യതകൾ കുറയ്‌ക്കണമെന്നുണ്ടെങ്കിൽ ഇനി പറയുന്ന ഭക്ഷണങ്ങൾ ശീലമാക്കാം..
ബ്രൊക്കോളി
പൊതുവെ മലയാളികൾക്ക് കണ്ട് പരിചയമില്ലാത്ത പച്ചക്കറിയായിരിക്കും ഇതെങ്കിലും നമ്മുടെ ചന്തകളിൽ ഇപ്പോൾ സുലഭമായി ലഭിക്കുന്ന പച്ചക്കറി തന്നെയാണ് ബ്രൊക്കോളി. സൾഫറഫൈൻ എന്ന ഘടകം ഈ പച്ചക്കറിയിൽ ധാരളം അടങ്ങിയിട്ടുള്ളതിനാൽ കാൻസർ വരാനുള്ള സാധ്യതകൾ കുറയ്‌ക്കുന്നു. അടുത്തിടെ നടത്തിയ പഠനത്തിൽ സ്ത്രീകളിലെ സ്തന കാൻസർ പോലുള്ളവ ചെറുത്തു നിർത്താൻ സഹായിക്കുന്ന പച്ചക്കറിയാണിതെന്നാണ് കണ്ടെത്തിയത്.
കാരറ്റ്
വെറുതെ കഴിക്കാൻ പോലും സ്വാദിഷ്ടമായ പച്ചക്കറിയാണ് കാരറ്റ്. പതിവായി കാരറ്റ് ഭക്ഷണത്തിൽ ഉൾപ്പെടുത്തി കഴിക്കുന്നത് വയറിനെ ബാധിക്കുന്ന കാൻസറുകൾ തടഞ്ഞു നിർത്താൻ സഹായിക്കുന്നുവെന്നാണ് പഠനങ്ങൾ സൂചിപ്പിക്കുന്നത്.
തക്കാളി
കാരറ്റ് പോലെ തന്നെ പലർക്കും ഇഷ്ടപ്പെട്ട ഒന്നാണ് തക്കാളി. ചുമന്നു തുടുത്തിരിക്കുന്ന തക്കാളികൾ ഇടാത്ത കറികൾ വളരെ വിരളമാണ്. ഒരു കറിക്ക് രുചി കൂട്ടുന്നതിനു പുറമെ പ്രോസ്‌റ്റേറ്റ് കാൻസർ പോലുള്ള രോഗങ്ങൾ ചെറുത്തു നിർത്താനും തക്കാളി സഹായിക്കുന്നു.
ബീൻസ്
ധാരാളം ഫൈബർ അടങ്ങിയിട്ടുള്ള പച്ചക്കറിയാണ് ബീൻസ്. ഇതിലടങ്ങിയിരിക്കുന്ന പോഷകഘടകങ്ങൾ കാൻസർ സെല്ലുകൾ ശരീരത്തിലുണ്ടാകാനുള്ള സാധ്യത കുറയ്‌ക്കുന്നു. ഭക്ഷണത്തിൽ ബീൻസ് ഉൾപ്പെടുത്തി കഴിക്കുന്നത് 75 ശതമാനം വരെ കാൻസർ വരാനുള്ള സാധ്യത കുറയ്‌ക്കുന്നു.
ഒലിവ് ഓയിൽ
വിലയുടെ കാര്യത്തിൽ മുൻപന്തിയിൽ നിൽക്കുന്ന ഒലിവ് ഓയിലിനെ പലപ്പോഴും അടുക്കളപ്പുറങ്ങളിൽ കാണാറില്ല. എന്നാൽ വിലയുടെ കാര്യത്തിലെന്നതു പോലെ തന്നെ ഗുണത്തിന്റെ കാര്യത്തിലും മുൻപന്തിയിലാണ് ഒലിവ് ഓയിൽ. ഈ എണ്ണ ഭക്ഷണത്തിലുൾപ്പെടുത്തി കഴിക്കുകയാണെങ്കിൽ സ്തന കാൻസർ, കുടൽ കാൻസർ തുടങ്ങിയവ വരാനുള്ള സാധ്യതകൾ കുറയ്‌ക്കുന്നുവെന്നാണ് പഠനങ്ങൾ പറയുന്നത്.
