കൊൽക്കത്ത: സന്ദേശ്ഖാലി സംഭവത്തിൽ ദേശീയ മനുഷ്യാവകാശ കമ്മീഷൻ സ്വമേധയാ കേസെടുത്തു. ഇത് സംബന്ധിച്ച് കമ്മീഷൻ വാർത്താക്കുറിപ്പ് പുറത്തിറക്കി. മാദ്ധ്യമ റിപ്പോർട്ടുകളുടെ അടിസ്ഥാനത്തിലാണ് കേസെടുത്തിരിക്കുന്നുത്. സംഭവത്തിൽ മനുഷ്യാവകാശ കമ്മീഷൻ സന്ദേശ്ഖാലിയിലേക്ക് അന്വേഷണ സംഘത്തെ അയക്കും. എക്സിലും ഇത് വ്യക്തമാക്കി കമ്മീഷൻ കുറിപ്പ് പങ്കുവച്ചിട്ടുണ്ട്.
തൃണമൂൽ നേതാവ് ഷാജഹാൻ ഷെയ്ഖിന്റെ നേതൃത്വത്തിൽ സ്ത്രികൾക്ക് നേരെ ബലാത്സംഗവും ഭൂമി തട്ടിപ്പും നടന്നിരുന്നു. പ്രദേശത്തെ സ്ത്രീകൾ തന്നെ വാർത്ത പുറത്തുവിട്ടതോടെയാണ് രാജ്യം നടുങ്ങിയത്. എന്നാൽ സംസ്ഥാന ഭരണകൂടം വാർത്തകളെ തമസ്കരിക്കുന്ന നിലപാടായിരുന്നു സ്വീകരിച്ചത്.
പ്രധാന പ്രതിപക്ഷമായ ബിജെപി അടക്കമുള്ള പാർട്ടികൾക്ക് സ്ഥലത്തേക്ക് പ്രവേശനം നിഷേധിക്കുകയും പോലീസിനെ ഉപയോഗിച്ച് സ്ത്രീകളെ അടിച്ചമർത്തുകയുമായിരുന്നു മമത സർക്കാർ. എന്നാൽ ഇക്കഴിഞ്ഞ ദിവസം സ്ഥലം സന്ദർശിച്ച് ദേശീയ വനിതാ കമ്മീഷൻ പ്രദേശത്ത് തുടരുന്ന അശാന്തിയെ രൂക്ഷമായി വിമർശിച്ചിരുന്നു. സംസ്ഥാനത്തുള്ള ഗുരുതര ആഭ്യന്തര വീഴ്ചയാണെന്നും രാഷ്ട്രപതി ഭരണത്തിൽ കുറഞ്ഞൊന്നും അന്വേഷണത്തിന് സഹായിക്കില്ലെന്നും പറഞ്ഞിരുന്നു.
