ഭക്ഷണം കഴിച്ചു കഴിഞ്ഞാൽ പിന്നെ പല്ലിനിടയിൽ കുത്താനുള്ള സൂചിയോ, ടൂത്ത് പിക്കോ അന്വേഷിച്ചു നടക്കുന്നത് പലരുടെയും വീട്ടിലെ നിത്യ കാഴ്ചയായിരിക്കും. ഇറച്ചിയോ മീനോ ഉണ്ടാക്കിയ ദിവസങ്ങളിലാണെങ്കിൽ ഈ വസ്തുക്കൾ അന്വേഷിച്ചു നടക്കുന്നവരുടെ എണ്ണം കൂടുതലുമായിരിക്കും. പല്ലിനിടയിൽ കുടുങ്ങിയ ഭക്ഷണാവശിഷ്ടങ്ങൾ നീക്കം ചെയ്യാനുള്ള ധൃതിയിൽ ആഞ്ഞൊരു കുത്ത് കുത്തിയാൽ പിന്നെ മോണയിൽ നിന്നും രക്തം വരുന്നതും കാണാം. ഇത്തരത്തിൽ പല്ലിനിടയിൽ സ്ഥിരമായി കുത്തുന്ന സ്വഭാവക്കാരാണ് നിങ്ങളെങ്കിൽ ഇക്കാര്യങ്ങൾ അറിഞ്ഞോളൂ..
സാധാരണയായി പല്ലിനിടയിൽ കുത്താൻ സൂചി പിന്നോ, ടൂത്ത് പിക്കോവായിരിക്കും നാം ഉപയോഗിക്കുന്നത്. എന്നാൽ ഇത്തരം വസ്തുക്കളുടെ ഉപയോഗം മോണയിൽ നിന്നും രക്തം വരുന്നതിനും അത് പിന്നീട് മോണവീക്കം പോലുള്ള രോഗങ്ങളിലേക്ക് വഴിമാറുന്നതിനും കാരമമാകുന്നു. ഇത് പല്ലുകൾ പെട്ടന്ന് ഇളകി പോകുന്നതിനും മോണയിൽ പഴുപ്പുണ്ടാക്കുന്നതിനും കാരണമാകുന്നു. ദ്രവിച്ച പിന്നുകൾ വായയിലിടുമ്പോൾ ഇത് മറ്റു പല ഇൻഫെക്ഷനുകളിലേക്കും വഴി വയ്‌ക്കും. ഇത്തരം സാഹചര്യങ്ങളിൽ കുടുങ്ങിയ ഭക്ഷണാവശിഷ്ടങ്ങൾ നീക്കം ചെയ്യാൻ പിന്നെ എന്ത് ചെയ്യും? ഇക്കാര്യങ്ങൾ പരീക്ഷിച്ചു നോക്കാം..
പല്ലുകൾക്കിടയിൽ ഭക്ഷണാവശിഷ്ടങ്ങൾ കുടുങ്ങുന്നതിന് പലതുണ്ട് കാരണങ്ങൾ. പല്ലുകൾക്കിടയിലുള്ള അകലം കൂടുമ്പോഴും പല്ലിന് തേയ്മാനം സംഭവിക്കുമ്പോഴും ഇത്തരത്തിൽ ഭക്ഷണാവശിഷ്ടങ്ങൾ കുടുങ്ങുന്നു. ശരിയായ ദന്തശുചിത്വം പാലിക്കുക എന്നതാണ് ഇതിനുള്ള ഏക മാർഗം. ദിവസവും ശരിയായ രീതിയിൽ രണ്ട് നേരം ബ്രഷ് ചെയ്യുക. ആറ് മാസത്തിലൊരിക്കൽ ദന്തവിദഗ്ധനെ കണ്ട് പല്ലിന്റെ അപാകതകൾ പരിഹരിക്കുക. മോണയിലുണ്ടാകുന്ന പ്രശ്‌നങ്ങൾക്ക് ഫ്‌ളാപ് സർജറി ചെയ്യുവാനും മോണയിൽ മരുന്നുകൾ ഉപയോഗിച്ച് വൃത്തിയാക്കുന്ന രീതികൾ സ്വീകരിക്കാനും വിദഗ്ധർ നിർദ്ദേശിക്കുന്നു.
