ലക്നൗ: അയോദ്ധ്യാ രാമക്ഷേത്രത്തിൽ ദർശനം നടത്തി കന്നട താരം രക്ഷിത് ഷെട്ടി. സഹോദരൻമാർക്കും അടുത്ത സുഹൃത്തുക്കൾക്കുമൊപ്പമാണ് അദ്ദേഹം രാമക്ഷേത്രത്തിൽ ദർശനത്തിനെത്തിയത്. അയോദ്ധ്യയിൽ നിന്നുള്ള താരത്തിന്റെ ചിത്രങ്ങൾ ആരാധകർ ഇതിനോടകം ഏറ്റെടുത്ത് കഴിഞ്ഞു.
രാവിലെയോടെ ക്ഷേത്രത്തിലെത്തിയ താരം പ്രത്യേക പൂജകളിൽ പങ്കെടുത്തു. ക്ഷേത്ര തന്ത്രിമാർക്കൊപ്പം താരം പൂജയിൽ പങ്കെടുക്കുന്ന ചിത്രങ്ങളും വീഡിയോകളും പുറത്തുവന്നു. പരമ്പരാഗത വസ്ത്രം ധരിച്ചാണ് രക്ഷിത് ക്ഷേത്രത്തിൽ എത്തിയത്. കാവിനിറത്തിലുള്ള ഷാളും തിലകവും അണിഞ്ഞെത്തിയ രക്ഷിതിന്റെ ചിത്രങ്ങൾ വൈറലാവുകയാണ്.
ക്ഷേത്രത്തിലെ മനോഹര നിമിഷങ്ങളും രക്ഷിത് പങ്കുവച്ചിട്ടുണ്ട്. ഇതിൽ രാമക്ഷേത്തിന് മുന്നിൽ നിന്നുള്ള ചിത്രവും രാം ലല്ലയ്ക്ക് സമീപത്ത് നിന്നുള്ള ചിത്രങ്ങളും പങ്കുവച്ചിട്ടുണ്ട്. രാമക്ഷേത്രത്തിൽ ദർശനം നടത്താൻ കഴിഞ്ഞ ദിവസമാണ് നടനും സംഘവും അയോദ്ധ്യയിൽ എത്തിയത്. ഇവിടെനിന്നുള്ള മറ്റ് ചിത്രങ്ങളും സോഷ്യൽ മീഡിയയിൽ ശ്രദ്ധ നേടുകയാണ്.
ജനുവരി 22 നായിരുന്നു അയോദ്ധ്യാ രാമക്ഷേത്രത്തിന്റെ പ്രണപ്രതിഷ്ഠാ ചടങ്ങ് നടന്നത്. രാജ്യത്തെ പ്രമുഖരായ നിരവധി വ്യക്തികൾ ചടങ്ങിൽ പങ്കെടുത്തു. പ്രാണപ്രതിഷ്ഠാ ചടങ്ങിൽ തെലുങ്ക് സിനിമയിൽ നിന്ന് നടൻ നഖിൽ കുമാറും നടനും സംവിധായകനുമായ ഋഷഭ് ഷെട്ടിയും പങ്കെടുത്തിരുന്നു.
