ന്യൂഡൽഹി: അന്താരാഷ്ട്ര വനിതാ ദിന ആശംസകൾ നേർന്ന് രാഷ്ട്രപതി ദ്രൗപദി മുർമു. രാജ്യത്തിന്റെ പുരോഗതിയിൽ സ്ത്രീകളുടെ പങ്ക് വളരെയധികം വിലമതിക്കുന്നതാണെന്ന് പറഞ്ഞ രാഷ്ട്രപതി, ഇന്ന് ആഘോഷിക്കേണ്ട ദിനമാണെന്നും പറഞ്ഞു. എക്സിലൂടെയാണ് രാഷ്ട്രപതി ആശംസകൾ നേർന്നത്.
വനിതാ ദിനാശംസകൾ! രാജ്യത്തെ നാരീ ശക്തികൾക്ക് ആഘോഷിക്കാനുള്ള അവസരമാണിത്. സ്ത്രീകളുടെ പുരോഗതിയിലൂടെയാണ് ഒരു സമൂഹത്തിന്റെ പുരോഗതി അളക്കുന്നത്. കായിക രംഗം മുതൽ ശാസ്ത്ര രംഗം വരെയുള്ള എല്ലാമേഖലകളിലും സ്ത്രീകൾ രാജ്യത്തിന് അഭിമാനമാകുന്നു. അവർക്ക് നേരിടേണ്ടി വരുന്ന അവഗണനകൾ ഇല്ലാതാക്കാനും സ്വപ്നങ്ങൾക്ക് ചിറകുപകരാനും നമുക്ക് ഒരുമിച്ച് പ്രവർത്തിക്കാം, കാരണം നാളെത്തെ ഇന്ത്യയെ കെട്ടിപ്പടുക്കുന്നത് അവരാണ്.- രാഷ്ട്രപതി എക്സിൽ കുറിച്ചു.
രാജ്യത്തെ സ്ത്രീകൾക്ക് പ്രധാനമന്ത്രി നരേന്ദ്രമോദിയും ആശംസകൾ നേർന്നു. നാരീശക്തികളുടെ കഴിവിൽ രാജ്യത്തിന് അഭിമാനമുണ്ടെന്നും അവരുടെ നേട്ടങ്ങളെ അഭിനന്ദിക്കുന്നുവെന്നും പ്രധാനമന്ത്രി പറഞ്ഞു.
