കന്യാകുമാരി: ഭക്തി നിർഭരമായ ശിവാലയ ഓട്ടത്തിന് തുടക്കമായി. കന്യാകുമാരി ജില്ലയിലെ മുഞ്ചിറ തിരുമല മഹാദേവക്ഷേത്ര സന്നിധിയില്‍ സന്ധ്യാ ദീപാരാധന തൊഴുതാണ് ഭക്തർ ക്ഷേത്ര ദർശനം ആരംഭിച്ചത്. കഴിഞ്ഞ ദിവസം വൈകിട്ടാണ് കന്യാകുമാരി ജില്ലയിലെ 12 ശിവക്ഷേത്രങ്ങളെ ബന്ധിപ്പിച്ചു നടക്കുന്ന ശിവാലയ ഓട്ടത്തിന് തുടക്കം കുറിച്ചത്.
ഏകദേശം 110 കിലോമീറ്റർ ദൂരമാണ് ഓട്ടത്തിലുള്ളത്. ഇത്രയും ദൂരം യാത്ര ചെയ്തു തിരുനട്ടാലത്ത് ശങ്കരനാരായണനെ തൊഴുതാണ് തീർത്ഥാടനം പൂർത്തിയാക്കുന്നത്. തിരുമല, തിക്കുറുശ്ശി, തൃപ്പരപ്പ്, തിരുനന്തിക്കര, പൊന്മന, പന്നിപ്പാകം, കല്‍ക്കുളം, മേലാങ്കോട്, തിരുവിടയ്‌ക്കോട്, തിരുവിതാംകോട്, തൃപ്പന്നികോട്, തിരുനട്ടാലം എന്നീ 12 ക്ഷേത്രങ്ങളാണ് ശിവാലയ ഓട്ടത്തിലെ ക്ഷേത്രങ്ങൾ. 12 ശിവക്ഷേത്രങ്ങളിലെ വിവിധ രൂപത്തിലുള്ള രുദ്രന്മാരെ കാല്‍നടയായി സഞ്ചരിച്ച് ദര്‍ശനം നടത്തിയാണ് ഭക്തര്‍ ശിവാലയ ഓട്ടചടങ്ങ് നടത്തുന്നത്.
തിരുവനന്തപുരം-കന്യാകുമാരി ജില്ലകളിലെ ഭക്തരാണ് ശിവാലയ ഓട്ടത്തിന് പ്രധാനമായും പങ്കെടുക്കുന്നത്. കാൽനടയായി സഞ്ചരിക്കുന്നതാണ് രീതി. വാഹനങ്ങളിൽ ദർശനത്തിനെത്തുന്നവരും ഉണ്ട്.
